Ֆրանսիայի նախկին նախագահ Նիկոլա Սարկոզին Valeurs Actuelles պահպանողական շաբաթաթերթին տված հարցազրույցում հայտարարել է, որ չի ցանկանում վերադառնալ քաղաքականություն, որը նրա մոտ «մահացու գլխացավ է առաջացնում», սակայն հնարավոր է՝ կյանքը նրան այլընտրանք չթողնի: Այս մասին հայտնում է Financial Times-ը:
Սարկոզին քննադատել է Մալիում Ֆրանսուա Օլանդի ռազմական օպերացիան՝ հայտարարելով, որ չի կարելի զորքերը մտցնել մի երկիր, որտեղ կառավարություն չկա: Պարբերականը հիշեցնում է, որ Մալիում, ուր հունվարին Ֆրանսիան մտցրեց իր զորքերը, որպեսզի արմատական իսլամիստներին թույլ չտա տիրանալ երկրի մայրաքաղաքին, սպանվել է 4-րդ ֆրանսիացի զինվորը:
«Ըստ երևույթին, Սարկոզին իր հնարավոր վերադարձի մասին մտքերի հիմքում դնում է այն ենթադրությունը, որ Օլանդին չի հաջողվի տնտեսական բարեփոխումներ կատարել և երկրում հակասությունների պատճառով վակուում կձևավորվի»,- գրում է լրագրող Շեհերզադա Դանեշկուն:
Նրա խոսքով՝ Սարկոզին հայտարարել է, որ հասարակական կյանք կվերադառնա ոչ թե քաղաքականության միջոցով, այլ «միջազգային դաշտում վարկանիշի» և «տնտեսական հզոր նախաձեռնությունների» շնորհիվ՝ չճշգրտելով, թե ինչ նկատի ունի:
Դանեշկուն գրում է, որ ընտրություններում պարտվելուց հետո Սարկոզին հեռացել է հասարակական կյանքից և իր ժամանակը նվիրել է կնոջն ու դստրիկին: