Իտալիայի հյուսիսի այն բնակիչներին, որոնք չեն պայքարում մոծակների դեմ, 50-500 եվրո տուգանք է սպառնում՝ հայտնում է Mignews-ը: Միաժամանակ, ինչպես բացատրում են Մոնտեբելունա քաղաքի քաղաքապետարանում, խնդիրը ոչ թե յուրաքանչյուր միջատին հետապնդելն է, այլ դրանց պոպուլյացիայի բնական ավելացմանը չնպաստելը:
Ամռան սկզբին քաղաքի իշխանությունները որոշել են պայքարել ոչ միայն մոծակների, այլև տեղի այն բնակիչների դեմ, որոնք նպաստում են մոծակների թվի ավելացմանը:
Քաղաքի իշխանությունները հատուկ որոշում են հրապարակել տեղի բնակիչների, բնակավայրերի վարչակազմերի, ֆիրմաների և խանութների տերերի, նաև ֆերմերային տնտեսությունների համար, որը գործում է մինչև հոկտեմբերի վերջը: Ըստ այդմ՝ արգելվում է բնակարաններում և աշխատավայրերում, պատշգամբներում ու այգիներում առարկաներ և կոնտեյներներ բաց թողնել, որոնցում կարող է անձրևաջուր հավաքվել: Դա նշանակում է, որ մարդուն կարող են տուգանել պատշգամբում շշեր և ծաղկամաններ տեղադրելու կամ ծածկերի համար, քանի որ այնտեղ կարող է անձրևաջուր հավաքվել:
Արգելքների երկար ցուցակում խորհուրդ է տրվում հորերն ու անձրևաջրի հավաքվելու վայրերը պարբերաբար ախտահանել և խոտը հնձել, որպեսզի մոծակները չկարողանան այնտեղ բազմանալ:
