Եվրոգոտու 19 երկրների նախագահների ու վարչապետների գագաթնաժողովը որոշում է ընդունել Հունաստանին թողնել արժութային բլոկում՝ վարկատուների առջև պարտավորությունների կատարման մասին Աթենքի հետ ձեռք բերված համաձայնության հիման վրա։ Այս մասին հայտնում է TASS գործակալությունը՝ հղում անելով հանդիպման կուլիսների աղբյուրին։
«Ձեռք է բերվել փոխըմբռնում Հունաստանի օգնության երրորդ ծրագրի մեկնարկի մասին, ինչը երաշխավորում է եվրոգոտու կազմում երկրի պահպանում»,- ասել է նա։
Դիվանագետն ընդգծել է, որ երրորդ ծրագիրը կիրականացվի խիստ փուլերով՝ ըստ Հունաստանի կողմից բյուջետային միջոցառումների իրականացման։
Առաջին քայլը, որը պետք է ձեռնարկի Աթենքը իր պարտավորությունների կատարման համար, կդառնա խորհրդարանի կողմից մինչև հուլիսի 14-ը ինստիտուտների հետ համաձայնեցված կառուցվածքային բարեփոխումների ընդունումը։ Խոսքը 6 օրինագծերի մասին է, այդ թվում՝ կենսաթոշակային և հարկային բարեփոխումների՝ ներառալ ԱԱՀ համակարգի վերանայումը։
Այնուհետև՝ չորեքշաբթի, կկայանա Եվրախմբի հերթական հանդիպումը, որը կհաստատի Հունաստանի վարկավորման երրորդ եռամյա ծրագրի գործարկումը։
Նախնական տեղեկություններով՝ երրորդ եռամյա ծրագրի ծավալը կկազմի 90 մլրդ եվրո՝ արտոնյալ վարկերի տեսքով։ Այս տեղեկությունը, սակայն, կրում է նախնական բնույթ։ Ծրագրի բոլոր մանրամասների հստակեցման բանակցությունները դեռևս առջևում են։
