Թուրքական Dünya Bülteni լրատվական կենտրոնի փոխանցմամբ՝ ԱՄՆ նախագահ Բարաք Օբամայի՝ ԴԱԻՇ-ի դեմ պայքարի հարցերով հատուկ ներկայացուցիչ, բանակի պաշտոնաթող գեներալ Ջոն Ալենի գլխավորած պատվիրակությունը Թուրքիայում հանդիպել է այդ երկրի առաջին փոխարտգործնախարար Ֆերիդուն Սինիրլիօղլուի հետ:
Ամերիկյան պատվիրակությունը թեև չի այցելել Թուրքիայի Գլխավոր շտաբ, սակայն այցելել է Թուրքիայի ԱԳՆ: Հանդիպումը տևել է մոտ 8 ժամ, ինչը վերջին տարիներին թուրք-ամերիկյան ամենատևական հանդիպումներից մեկն էր: Ամերիկյան պատվիրակության կազմում էր Պենտագոնի խորհրդական Քրիստին Վորմութը:
Հանդիպման ժամանակ քննարկվել է ԴԱԻՇ-ի դեմ պայքարի հարցը, ամերիկյան կողմը ցանկություն է հայտնել Մոսուլը ԴԱԻՇ-ից ազատագրելու գործողության համար օգտագործել «Ինջիրլիքի» ավիաբազան, որտեղից կարող են գործել մարտական ինքնաթիռներն ու հարվածային անօդաչու թռչող սարքերը (ԱԹՍ):
Թուրքական կողմը, սակայն, դրա պայման է առաջ քաշել, այն է՝ «Դեմոկրատական միություն» կուսակցությունը (PYD) թուրք-սիրիական սահմանին «Քրդական գոտի» չձևավորի։ Այս կուսակցությունը թուրքական կողմը որակում է որպես «Քրդստանի աշխատավորական» կուսակցության (PKK) սիրիական թև: Թուրքական կողմը հայտնել է, թե չի ցանկանում, որ այդ տարածաշրջանը հայտնվի PYD-ի կամ ԴԱԻՇ-ի ձեռքում: Ավելի վաղ Բարաք Օբաման հայտարարել էր, որ ինտենսիվացվելու են ԴԱԻՇ-ի դեմ ավիահարվածները:
