Եվրոգոտուց Հունաստանի դուրս գալուց անհրաժեշտ է խուսափել: TASS-ի հաղորդմամբ՝ այս մասին հայտարարել է Եվրահանձնաժողովի նախագահ Ժան-Կլոդ Յունկերը Ստրասբուրգում Եվրոպական խորհրդարանի նիստում ելույթի ժամանակ:
«Իմ ձգտումն է խուսափել եվրոգոտուց Հունաստանի դուրս գալուց,- նշել է Յունկերը:- ժամանակն է վերադառնալ բանակցային սեղանի շուրջ»:
«Անհրաժեշտ է հարգել հույների կարծիքը: Բայց պետք է վերլուծել ու հասկանալ՝ ինչ է նշանակում այդ կարծիքը, և ինչ է նշանակում հանրաքվեի ժամանակ արտահայտված «ոչ»:-ը Հունաստանի վարչապետը հրաշալի գիտի, որ այն հարցը, որը հանրաքվեի էր դրվել, չէր համապատասխանում բանակցությունների հետ կապված այն իրավիճակին, որն առկա էր Հունաստանում դրա անցկացման ժամանակ: Ես մտադիր եմ հասնել նրան, որ Հունաստանի վարչապետը համապատասխան բացատրություններ տա քվեարկության արդյունքների վերաբերյալ: Որովհետև քվեարկության դրված հարցերն արդեն տևական ժամանակ այլևս օրակարգում չէին: Եվ դա հիանալի հայտնի է բոլորին, ովքեր ուշադիր հետևել են բանակցությունների գործընթացին»,- ասել է Յունկերը:
«Բայց ներկայումս արդեն պետք չէ պարզել՝ ով էր ճիշտ, ով էր մեղավոր: Ժամանակն է, որ մենք մի կողմ թողնենք բոլոր բազմաթիվ պահանջները և մեր անձնական հավակնությունները: Պետք է զբաղվել անմիջապես իրավիճակով»,- նշել է Յունկերը: «Բայց ես դեմ եմ այդ հարցին և նման որոշումներին գռեհկական մոտեցմանը»,- ասել է Յունկերը:
