ԱՄՆ-ի սենատորները արգելափակում են Կենտրոնական հետախուզական վարչության նոր ղեկավար Ջոն Բրենանի թեկնածության քվեարկություն,- հաղորդում է RIA Novosti-ն:
Չորեքշաբթի, երբ պալատը պետք է որոշում կայացներ, Բրենանի նշանակման դեմ հանդես է եկել հանրապետական Ռենդ Փոլը (Կենտուկի նահանգ)՝ դիմելով հարցի քննարկման ձգձգման գործընթացին:
Փոլն անցած շաբաթ սպառնում էր արգելափակել Բրենանի թեկնածությունը: Իր այս որոշում նա մեկնաբանել է նրանով, որ ԱՄՆ-ի նախագահ Բարաք Օբամայի վարչակազմը մտադիր է անօդաչուներ կիրառել երկրի ներսում և ԱՄՆ-ի քաղաքացիների դեմ: Չնայած այն հանգամանքին, որ նախօրեին ԱՄՆ-ի արդարադատության նախարարությունը մեկնաբանել է, որ ԱՄՆ-ում անօդաչուներ կարող են կիրառվել միայն պատերազմի կամ ահաբեկիչների լայնածավալ հարձակման դեպքում, Փոլն իր որոշումը չի վերանայում:
Սենատորն իր կողմնակիցների հետ ավելի քան վեց ժամ խորհրդարանականներին թույլ չի տվել քվեարկել, որի արդյունքում նիստը փակվել է առանց որոշում կայացնելու:
«Ես այստեղ եմ, որպեսզի ձգձգեմ ԿՀՎ-ի ղեկավարի պաշտոնին Բրենանին նշանակելու հարցը: Ես կխոսեմ այնքան, որքան պահանջվի: Ես կխոսեմ այնքան ժամանակ, մինչև նախագահը չասի. «Ո՛չ, ես չեմ սպանի ձեզ սրճարանում»,- ասել է Փոլը:
Դեմոկրատական մեծամասնության ղեկավար Հարի Ռիդը Փոլի կողմնակիցների ելույթից հետո հայտարարել է, որ կփորձի ձեռնարկել ձգձումը դադարեցնելու քվեարկություն, սակայն դրա համար անհրաժեշտ է հավաքել 100 սենատորներից 60-ի ձայները:
