Եգիպտոսի Գերագույն վարչական դատարանը որոշում է կայացրել լուծարել տասնյակ տարիներ երկրի ղեկը ստանձնած, իշխող Ազգային ժողովրդավարական կուսակցությունը, որը գլխավորում էր երկրի նախկին նախագահ Հոսնի Մուբարաքը: Դատարանը որոշմամբ, կուսակցության ողջ ունեցվածքը, ֆինանսական միջոցներն ու սեփականությունը փոխանցվում են պետության տնօրինմանը: Այս մասին հաղորդում է France Presse գործակալությունը:
Ազգային ժողովրդավարական կուսակցությունը Մուբարաքի պաշտոնանկությունից հետո գտնվում էր լուրջ քաղաքական և ֆինանսական ճգնաժամի մեջ. ղեկավար մարմնի մեծ մասը ձերբակալված է, անդամների զգալի մասը հեռացել է կուսակցությունից: Դատարանը որոշումը հիմնավորել է նրանով, թե «անտրամաբանական է, որ ռեժիմը հեռացվել է, իսկ նրա գործիքը` կուսակցությունը` դեռ ոչ»:
Հիշեցնենք, որ Մուբարաքի և նրա ընտանիքի անդամների դեմ նույնպես հարուցվել են քրեական գործեր: Նրա որդիները գտնվում են բանտերում, իսկ Մուբարքը կձերբակալվի հիվանդանոցից դուրս գրվելուց անմիջապես հետո, ուր նա հիմա գտնվում է հարցաքննության ժամանակ ունեցած սրտի նոպայի պատճառով: