«Ինտեր ՌԱՕ»-ի կառավարման խորհրդի նախագահ Բորիս Կովալչուկը ռուսաստանյան լրատվամիջոցների փոխանցմամբ երեկ հայտարարել է, որ «Հայաստանի էլեկտրական ցանցեր» ընկերության վնասները երկրում գործող կարգավորման համակարգի հետևանք են։
Նա նաև նշել է, որ Հայաստանի էլեկտրաէներգետիկ ոլորտում բարդ իրավիճակն ունի բացառապես տնտեսական, այլ ոչ թե քաղաքական պատճառներ:
«Առաջին լրատվական»-ի հետ զրույցում Ռուսաստանի «Ազգային էներգետիկ անվտանգության հիմնադրամի» հիմնադիր և գլխավոր տնօրեն, տնտեսագետ Կոնստանտին Սիմոնովը նշեց, որ ոլորտում կան բավականին շատ խնդիրներ, և այն համալիր լուծում է պահանջում: «Կա կառավարման արդյունավետության բաց: Հայաստանի տնտեսությունն այսօր շուկայական, ուժեղ և ամբողջական չի թվում, և այս իրավիճակում նման խնդիրներ իհարկե կարող են առաջանալ՝ կոռուպցիա, կառավարման անարդյունավետություն և այլն: Մի խնդիրն առաջացնում է մյուսը, ինչի հետևանքով էլ այս իրավիճակն է ստեղծվել ու առաջացրել հանրության դժգոհությունը»,- ասաց նա:
Դիտարկմանը ի պատասխան, թե, փաստորեն, ռուսական ընկերությունը խնդիրը դնում է բացառապես Հայաստանի ուսերին, արդյոք միայն մեզ մո՞տ է խնդիրը, Կ.Սիմոնովն ասաց. «Ես կարծում եմ, որ համալիր խնդիր է: Շատերը Հայաստանում ուզում են, որ կախարդական փայտիկի միջոցով տարիֆների հարցը լուծվեր։ Միայն «Իիտեր ՌԱՕ»-ն այդ հարցը չի լուծի, իհարկե, «Ինտեր ՌԱՕ»-ն ունի պատասխանատվության բաժին, որ չի կարողանում իր մենեջմենթը ղեկավարել: Բայց մյուս կողմից ասեմ, որ մենք գործ ունենք միանգամայն ոչ շուկայական հարցի հետ»:
Նա անդրադարձավ նաև այն խոսակցություններին, որ ՀԷՑ-ը միանգամայն ուրիշ սեփականատեր է ունենալու․ «Ասում են, թե այն տրվելու է միանգամայն ուրիշ սեփականատիրոջ, հայ բիզնեսմեններին, որոնք Ռուսաստանում են աշխատում: Լավ, տվեք նրանց, հետո՞: Այս խնդիրն այնքան հեշտ չէ, ինչքան թվում է: Այն պետք է երկկողմանի լուծում ստանա: Մի սպասեք, թե Մոսկվայում հրաշք կլինի, և խնդիրը լուծում կստանա: Մենք մեր վրայից պատասխանատվությունը չենք գցում, դա մեր սեփականությունն է, և այն ավելի խելամիտ պետք է ղեկավարել»:
