Ժոզե Մոուրինյոյի լռությունը` «կլասիկո»-ից առաջ տեղի ունեցած մամուլի ասուլիսում, չէր կարող շարունակություն չունենալ: Հիշեցնենք, որ The Special One-ը Իսպանիայի առաջնության 32-րդ տուրի «Բարսելոնա»-ի հետ խաղից առաջ կայացած մամուլի ասուլիսում չէր պատասխանել լրագրողների և ոչ մի հարցին` այդ իրավունքը զիջելով իր օգնական Այտոր Կարանկային: Մոուրինյոյի արարքին ի պատասխան լրագրողների մեծ մասն ընդհանրապես հարցեր չէին ուղղել:
Խաղից հետո պարզվել է. որ պորտուգալացին վիրավորվել է լրագրողների նման վարքից: Reuters-ի հաղորդմամբ` Մոուրինյոն AS-ի թղթակցի հարցին պատասխանել է. «Դուք AS-ի գլխավոր խմբագի՞րն եք: Եթե` ոչ, ապա ես չեմ պատասխանի: Չէ որ դուք ցանկանում էիք միայն գլխավորի հետ խոսել. այդպես չ՞է: Ես նույնպես կխոսեմ միայն նրա հետ, ոչ` նրա ներկայացուցիչների»:
Հաջորդ հարցին Ժոզեն նմանատիպ պատասխան է տվել. «Չեմ կարող պատասխանել: Ձեր հարգանքը չբավարարեց շփվել մի մարդու հետ, ով իսկապես հարգանքի է արժանի, ով երեք Եվրոգավաթ է նվաճել և ում ես վստահել էի ասուլիսում ինձ ներկայացնելու իրավունքը»: