Ժուռնալիստների «Ասպարեզ» ակումբի նախագահ Լևոն Բարսեղյանը, ով եղել է «Հազարամյակի մարտահրավերներ հիմնադրամի» Հայաստան ծրագրի շահառուների խորհրդի առաջին և երկրորդ կազմի անդամ, «Առաջին լրատվականի» հետ զրույցում նշեց, որ ինքն այս իշխանություններին բազմիցս զգուշացրել է, որ ծրագրի առաջադրած չափանիշները չապահովելով տապալելու են ծրագիրը. «Փաստորեն, նրանք շատ բարեհաջող տապալեցին այդ ծրագիրը»:
Նշենք, որ Հայաստանում ԱՄՆ դեսպան Մարի Յովանովիչը հայտարարել է, որ Հայաստանն այլևս չի կարող դիմել հիմնադրամի նոր ծրագրին մասնակցելու համար:
Բարսեղյանը նաև հիշեցրեց, որ Ռոբերտ Քոչարյանին անգամ ահազանգ-նախազգուշացում է հղել «Հազարամյակի մարտահրավերներ կորպորացիայի» (ՀՄԿ) տնօրեն Ջ.Դանիլովիչը` 2008-ի մարտի 10-ին, ասելով, որ Հայաստանի իրավիճակը ժողովրդավարության մասով թուլանում է, և առաջարկել է միջոցներ ձեռք առնել վիճակը բարելավելու համար: Ավելին` նույն տարվա ընթացքում ՀՄԿ-ն կասեցրեց ճանապարհային բաղադրիչի ֆինանսավորումը մոտ 60 մլն դոլարով:
Բարսեղյանը նշեց, որ դրամաշնորհ ստանալու համար երկիրը պետք է թվով 17 չափորոշիչների համապատասխաներ, որոնք մասնավորապես երեք խումբ են` արդար կառավարում, մարդկային ներդրումներ, տնտեսական ցուցանիշներ: Ավելին` երկրները, որոնք դրամաշնորհի են դիմում և մանավանդ հասնում են պայմանագրերի կնքման` անուղղակիորեն պարտավորվում են բարձրացնել այդ ցուցանիշները:
«ՀՀ իշխանությունները քիչ է` աճ չեն ապահովել, Մարտի 1-ով, ցուցարարների սպանությամբ, քաղաքական բանտարկյալներով և ազատությունների հետևողական սահմանափակումներով շարունակ նվազեցրել են մեր հեղինակությունը»,- նշեց Բարսեղյանը:
Բարսեղյանի կարծիքով, Հայաստանը շանս չունի երկրորդ դրամաշնորհը ստանալու. «Հիմնադրամի ներկայացրած բարեփոխումներն իրականացնելու համար Սերժ Սարգսյանը ստիպված է լինելու ազատել քաղբանտարկյալներին, բացահայտել Մարտի 1-ի մարդասպաններին և առնվազն ազատականացնել հավաքների իրավունքը»:
Հիշեցնենք, որ «Հազարամյակի մարտահրավերներ հիմնադրամը» մեր հարևան Վրաստանին արդեն երկրորդ դրամաշնորհն է տվել: Բարսեղյանի խոսքերով, Վրաստանի հանգամանքն այլ է. հաշվի առնելով իրենց ցուցանիշները և հաջողությամբ իրականացված ՀՄ-Վրաստան ծրագիրը` ՀՄԿ-ն որոշեց նոր դրամաշնորհ տալ:
«Ի դեպ, այդ դրամաշնորհների առյուծի բաժինը ներդրվում է հայաբնակ Ջավախքում: Երկրորդ դրամաշնորհ ստանում է նաև Գանան: Սրանք աննախադեպ բացառություններ են»,- հավելեց Բարսեղյանը:
