«Այս ընտրություններին իշխանությունների կողմից կիրառվել է հիմնական կեղծիքի մեխանիզմ, այդ պատճառով էլ մենք, որպես հաղթած թեկնածու, ճանաչում ենք Րաֆֆի Հովհաննիսյանին: Այս դեպքում մենք չենք կարևորում Րաֆֆի Հովհաննիսյանի անձը, պարզապես սատարելով ժողովրդավարական շարժումը՝ պահանջում ենք անվավեր ճանաչել ընտրությունների պաշտոնական արդյունքները»,- «Առաջին լրատվական»-ի հետ զրույցում ասաց ՀԱԿ դաշինքին մաս կազմող «Ժողովրդավարական ուղի» կուսակցության նախագահ Մանուել Գասպարյանը:
Նա անդրադարձավ նաև Րաֆֆի Հովհաննիսյան-Գագիկ Ծառուկյան հանդիպմանը.
«Իհարկե, դա կուսակցության և կոնկրետ Րաֆֆի Հովհաննիսյանի որոշելիքն է, ես չգիտեի, որ այդ հանդիպումը եղել է, հետո լրատվամիջոցներից տեղեկացա: Հանդիպումը, որպես այդպիսին, առողջ մոտեցում է, ցանկացած քաղաքական ուժ կարող է նման հանդիպումներ ունենալ, բայց եթե ես լինեի, ապա նման որոշում երևի թե չէի կայացնի»:
Մ. Գասպարյանը մասնակիորեն համաձայնեց մեր այն դիտարկման հետ, որ ՀԱԿ-ը ԲՀԿ-ի հետ համագործակցելու պատճառով շատ համակիրների կորցրեց, և անդրադառնալով Րաֆֆի Հովհաննիսյանի այս նախաձեռնությանը՝ ասաց. «ՀԱԿ-ն էլ, այո՛, մոտավորապես այդ ճանապարհով գնաց, չգիտեմ՝ ես կարծում եմ, որ դա կամ ժամանակավրեպ էր, կամ այս պահին ցանկալի չէր, որովհետև Րաֆֆի Հովհաննիսյանը բոլորին հրավիրել միանալու շարժմանը, և լավ կլիներ, եթե նախաձեռնությունը լիներ ԲՀԿ-ի կողմից՝ գային հրապարակ և ոչ թե գրասենյակում հանդիպեին:
Իմ սուբյեկտիվ կարծիքով՝ պետք է նաև հրապարակում կանգնած ժողովրդի կարծիքն իմանալ, իրենց պահանջները բավարարել և հարցնել, այլ ոչ թե նախապես պայմանավորվածություն ձեռք բերել, որովհետև գործընթացն արդեն այնպիսի զարգացում է ստացել, որ պահանջատերը ժողովուրդն է: Ամեն դեպքում՝ ես սա կոպտագույն սխալ չէի անվանի, բայց համարում եմ ժամանակավրեպ:
Իսկ ընդհանուր առմամբ՝ յուրաքանչյուր քայլ անելուց առաջ պետք է մտածել, թե այդ քայլն ինչքանով օգուտ կբերի գործին և ինչքանով կվնասի, այսինքն՝ նժարին պետք է դնել դրա օգուտներն ու վնասները, ինչպես նաև ժողովրդի պահանջը: Իսկ ես չէի տեսնում հարթակում կամ հարթակից ներքև Բարգավաճի հետ համագործակցելու պահանջ: Այդ դեպքում ես երկու ձեռքով կողջունեի այդ բանակցություններն ու խմորումները, բայց ներքևում կանգնած ժողովրդի մոտ ես ինքս այդ պահանջը չեմ տեսել»:
ԺՈՒԿ նախագահն անդրադարձավ նաև Րաֆֆի Հովհաննիսյանի՝ Սահմանադրական դատարան դիմելու որոշմանն ու ասաց, որ չնայած ՍԴ-ից սպասելիքները շատ քիչ են, ամեն դեպքում որոշումը ճիշտ էր. «ԿԸՀ-ն ասում է՝ իրավական հիմքերը բացակայում են, ես էլ մեկ ուրիշ բան կասեմ՝ իրավական հիմքերի բացակայությունն իշխանությունը հենց ընտրությունների օրն է ապահովում՝ ընտրատեղամասերում վախի և ահաբեկման միջոցով:
Ընտրատեղամասերում այնպիսի ճնշման ու անառողջ մթնոլորտ է տիրել, որ հանձնաժողովականներին թույլ չեն տվել անգամ հատուկ կարծիք գրել, գրանցվել են բռնության դեպքեր: Այսինքն՝ իշխանությունն ունի այն բոլոր լծակները, որոնց միջոցով ընտրությունների օրը կարողանում է հետագայի համար իրավական հիմքեր ստեղծելու հնարավորություն չտալ»: