Համաշխարհային տնտեսությունը վերականգնվում է, սակայն վտանգները դեռ չեն վերացել: Այս մասին կարծիք են հայտնել «Մեծ քսանյակի»` G20-ի ֆինանսների նախարարներն ու կենտրոնական բանկերի ղեկավարները, հաղորդում է Associated Press գործակալությունը:
Համատեղ հայտարարության մեջ ասվում է, որ տնտեսական դիրքերն ամրապնդվում են, իսկ պահանջարկը մասնավոր հատվածում` մեծանում: Միաժամանակ նրանք նշում են, որ անկման վտանգները դեռ շարունակում են ուժի մեջ մնալ: Նրանք կոչ են արել զգոնության և տնտեսության հետագա ամրապնդման:
Ինչ վերաբերում է իրավիճակին Մերձավոր Արևելքում և Հյուսիսային Աֆրիկայում, ապա G20-ի նախարարները մտահոգություն են հայտնել էներգակիրների գների հետագա աճի վերաբերյալ: G20-ի երկրները լրացուցիչ խնդիրներ են տեսնում` կապված Ճապոնիայի բնական աղետի և ճապոնական տնտեսության վրա այդ աղետի հետևանքների կապակցությամբ:
Նրանց հայտարարության մեջ առանձին անդրադարձ է կատարվել միջազգային արտարժութային համակարգի ամրապնդմանը: Դրա համար նրանք կարճաժամկետ կտրվածքով շեշտը դնելու են միջազգային շուկաներում լիկվիդայնության մաքսիմալ ապահովման վրա:
