«Առաջին լրատվական»-ի զրուցակիցն է ԱԺ «Բարգավաճ Հայաստան» խմբակցության պատգամավոր Աբրահամ Մանուկյանը:
– Պարոն Աբրահամյան, ինչպե՞ս եք գնահատում էլեկտրաէներգիայի դեմ պայքարող ակտիվիստների ու քաղաքացիների՝ Բաղրամյան պողոտայի գիշերային նստացույցը ոստիկանության կողմից դաժանորեն ցրելու քայլը:
– Ահագին ոգևորված եմ մեր երիտասարդներով, կարգին երիտասարդներ են: Ուրախ եմ, որ մեր ազգը նման երիտասարդներ ունի: Բայց, իհարկե, օրինականությունը պետք է պահպանել:
– Բայց այդ երիտասարդները խաղաղ ցույց էին անում և դրա իրավունքն ունեին:
– Ընդունում եմ, որ խաղաղ ցույց էին անում, բայց կարող էին բանակցել: Նախագահի հետ հանդիպելու առաջարկ եղավ, իմ կարծիքով՝ պետք էր հանդիպել: Միանշանակ: Միակողմանի չի լինում, պետք էր փոխզիջումների գնալ: Հնարավոր էր, որ գնային հանդիպեին, ու հարցը լուծվեր:
– Ցուցարարները պահանջում էին չեղյալ համարել էլեկտրաէներգիայի թանկացումը: Այդ հարցը կարո՞ղ էր լուծվել:
– Հնարավոր էր, չէ՞, որ լիներ: Ինչո՞ւ չփորձել:
– Հանրային ծառայությունները կարգավորող հանձնաժողովի նախագահ Ռոբերտ Նազարյանը էլեկտրաէներգիայի սակագինը բարձրացնելուց հետո դա բացառել էր:
– Իսկ ինչո՞ւ էր նախագահը հրավիրում հանդիպման, եթե խոսելու բան չկար:
– Միգուցե ցանկանում էր համոզել, որ մասնակիցները դադարեցնեին նստացույցը:
– Իսկ միգուցե այնպիսի փաստեր էր բերում, որոնցով կարելի էր համոզել: Ես բռնությանը դեմ եմ՝ սա մեկ: Հարկավոր էր նստացույցը շատ խաղաղ պայմաններում տեղափոխել այլ դաշտ, առաջարկում էին գնալ Օպերային հարակից հրապարակը: Կարող էին գնալ ու այնտեղ շարունակել իրենց բողոքն ու իրենց պահանջները ներկայացնել: Ցավում եմ, որ նման բան է կատարվել: Շատ եմ ցավում:
– Իսկ Բաղրամյան պողոտայում նստացույցը ցրելու՝ ոստիկանների գործողությունները համաչա՞փ էին:
– Ես միշտ քննադատում եմ բռնությունը:
– Փոխոստիկանապետ Լևոն Երանոսյանն անձամբ է կարգադրել «Առաջին լրատվական»-ի օպերատորին դաժան ծեծի ենթարկել:
– Շատ սխալ է արել: Ով անցել է օրենքով կարգավորված իր սահմանը, պետք է անպայման պատժվի:
– Իսկ ինչո՞ւ «Բարգավաճ Հայաստան» խմբակցության պատգամավորները ընդդիմադիր այլ պատգամավորների նման չբոյկոտեցին Ազգային ժողովի նիստը ու չհեռացան դահլիճից:
– Եթե դուք լսել եք, մեր բոլոր պատգամավորներն էլ քննադատեցին, բայց ես կողմնակից եմ, որ հարցը երկխոսության արդյունքում բերվի դաշտ ու կարգավորվի: