«Փաստորեն իշխանությունները գնում են բռնի գործողությունների մի հարցում, որտեղ մի կողմում կանգնած է մասնավոր ընկերությունը, մյուս կողմում՝ ամբողջ հայաստանյան հասարակությունը»,- «Առաջին լրատվական»-ի հետ զրույցում ասաց «Ազգային անվտանգություն» կուսակցության նախագահ, քաղաքագետ Գառնիկ Իսագուլյանը՝ անդրադառնալով այսօր՝ վաղ առավոտյան, էլեկտրաէներգիայի թանկացման դեմ բողոքող ակտիվիստների նկատմամբ ոստիկանության կողմից կիրառված բռնությանը:
Իսագուլյանի խոսքով, որքան էլ հետաքրքիր է, այս պայքարի մեջ իշխանությունները բավական կոշտ միջոցներով պաշտպանում են մասնավոր սեկտորի ներկայացուցիչներին: «Եվ այդ պայքարում ակնառու է դառնում այն, որ իշխանությունները պաշտպանում են ոչ թե հայկական էլէկտրացանցերը, այլ իրենք իրենց, քանի որ եթե խորանանք խնդրի բուն էության մեջ, ապա կպարզվի, որ այդ 30 կամ 300 միլիոնը յուրացվում է հենց իշխանական բուրգի կողմից, ու այս ամբողջ պայքարը այդ բուրգի կողմից իրենց գումարը պաշտպանելունն է ուղղված»,-հավելեց Իսագուլյանը:
Վերջինիս խոսքով՝ իշխանությունները փոխանակ իրենք ամբողջ իրավապահ համակարգը ուղղորդեն ստուգումներ իրականացնելու ՀԷՑ-ում, ուսումնասիրելու յուրացումներն ու չարաշահումները, ակտիվիստներին են պատժում ու բռնությունների ենթարկում նրանց: «Պետական ամբողջ մեքենան պետք է ուսումնասիրի, թե ուր են գնացել այդ փողերը: Ինչո՞ւ են պետական պաշտոնյայի կառուցած դղյակների փողերը մնացել կազմակերպության վրա, որը դա վճարել չի կարողանում: Սա է. իշխանությունը ընդամենը իր փողերն է պաշտպանում հասարակությունից: Բայց եթե ստուգվի այդ ամենը, ապա նախագահից սկսած մինչը վերջին չինովնիկ պետք է նստեն տարբեր գաղութներում»,- նկատեց Իսագուլյանը:
Ինչ վերաբերում է ոստիկանական գործողություններին, ապա մեր զրուցակցի խոսքով՝ նրանք ընդամենը հրաման են կատարել: Հրաման տվողին պետք է պարզել ու պատժել:
Անդրադառնալով այսօր ժամը 18:00-ին հրավիրված հավաքին ու դրա հնարավոր հետևանքներին, քաղաքագետն ասաց, որ քանի դեռ մենք մասնատված, մասնավոր հարցեր ենք բարձրացնում, ու իշխանությունը գործի է դնում իր ամբողջ մեքենան, դժվար է պայքարել: «Ես կարծում եմ, որ անհրաժեշտ է ընդհանրական հարցեր դնել, ոչ թե միայն հոսանքի թանկացման հարցը: Հարկավոր է, որ բոլորը միավորվեն ու հասկանան մի բան, որ առանձին-առանձին պայքարելով՝ այս իշխանությունների դեմ անհնար է: Պետք է համախմբվել, քանի որ օր օրի մենք արդեն ականատես ենք լինում, որ այլևս անհնար է, թալանը մարդկանց աչքերը փակել է, և այդ ֆոնին իշխանությունները կգնան անգամ զենքի կիրառման այդ ըմբոստ մասսայի նկատմամբ»,- կարծիք հայտնեց Իսագուլյանը՝ հավելելով, որ որպեսզի զենք չկիրառվի և իշխանությունները կարողանան, հասկանան, որ իրենց գնալու ժամանակն է, հարկավոր է, որ 50-100 հազար մարդ հավաքվի, համախմբվի: Իսկ դրա համար էլ հարկավոր է, որ միայն հոսանքի թանկացման հարցը չդրվի:
Իսագուլյանը ողբերգություն որակեց այն փաստը, որ քաղաքական ուժերը, քաղաքական գործիչներից և ոչ մեկը երեկ ու այսօր ակտիվիստների կողքին չէին: «Չի կարող ինչ որ շարժում, կազմակերպություն իր առաջ խնդիր դնել, և դա չունենա քաղաքական ենթատեքստ: Բայց մեր քաղաքական ուժերը մտածում են՝ թող այդ առաջին էշելոնը գնա, դրանից հետո մենք նրանց դիակների վրայով կգնանք: Բայց դա ճիշտ չէ: Քաղաքական կազմակերպությունները պետք է շատ ակտիվ լինեն, միավորվեն ու հասկանան, որ մենք երկիր ենք կորցնում»-եզրափակեց Իսագուլյանը: