Լոս Անջելեսում 98 տարեկան հասակում վախճանված ամերիկահայ միլիարդատեր, բարերար, Հայաստանի ազգային հերոս Քըրք Քըրքորյանի մահը Հայաստանում կորստի մթնոլորտ չառաջացրեց։ Առ այսօր պարզ չէ, թե ով է ՀՀ-ից մասնակցելու նրա հուղարկավորությանը։ Մեկը, ով Հայաստանի նորանկախ պատմության մեջ այդքան մեծ ներդրումներ է արել, ինչու չարժանացավ համարժեք գնահատանքի իշխանությունների կողմից և նրա հիշատակին նվիրված որևէ միջոցառում չկազմակերպվեց։ Արդյոք նման վարքով ՀՀ իշխանությունը չի՞ նսեմացնում նաև ՀՀ ազգային հերոսի ինստիտուտը, երբ ազգային հերոսի մահվան փաստն, ըստ էության, անտարբերության են մատնում։
«Առաջին լրատվական»-ի հետ զրույցում Հայկական վերածնունդ» շարժման Պրահայի մասնաճյուղի ներկայացուցիչ, տնտեսագետ Բագրատ Առաքելյանը, անդրադառնալով խնդրին, նշեց, որ նախ պետք է հասկանալ, թե ով է եղել Քըրքորյանը, ինչ կյանք է անցել՝ սկսած երկրորդ համաշխարհային պատերազմի ժամանակ ռազմական օդաչուից, վերջացրած ԱՄՆ ամենահայտնի միլիարդատերերից մեկով։
«Հայ ժողովուրդը մինչ օրս չի ունեցել զավակ, որը նման մեծ քաղաքա-տնտեսական ադդեցություն է ունեցել ոչ միայն ԱՄՆ-ում, այլ նաև աշխարհում։ Եվ այն հարցը, թե ով է մասնակցելու կամ չի մասնակցելու Հայաստանի կառավարությունից Քըրքորյանի հուղարկավորման արարողությանը, կարևորություն կարող է ունենալ միայն մեր իշխանավորների համար»,- ասաց նա։
Իսկ ինչ վերաբերում է հայաստանցիներին, Բագրատ Առաքելյանի կարծիքով, ճնշող մեծամասնության համար Քըրքորյանի ներդրումները, ֆինանսական և ոչ միայն, գրեթե հայտնի չեն։ Իսկ այն բանից հետո, երբ մեծ բարերարը, հասկանալով, որ իր հայաստանյան ներդրումների մի մասը թալանվում է, խզեց իր հարաբերությունները հայ իշխանավորների հետ և դադարեցրեց իր ծրագրերը Հայաստանում, այդ մասին կենտրոնական լրատվամիջոցներում լռում էին։
«Բացի դրանից, Քըրքորյանն առաջին հերթին գործի մարդ էր և իր արածը երբեք չէր գովազդում։ Ցավալի է, բայց հայաստանցիներն այսօր ավելի շատ ցնցված են Ժաննա Ֆրիսկեի մահով, քան Քըրքորյանի։ Իսկ եթե դիտարկենք մեր կառավարության վերաբերմունքը մեր ազգային հերոսների հանդեպ, ապա ես ուզում եմ հիշեցնել վերջերս տեղի ունեցած Ժիրայր Սեֆիլյանի և Պավել Մանուկյանի ձերբակալումները։ Կարծում եմ՝ մեկնաբանություններն ավելորդ են»,- հավելեց նա։
Նրա խոսքով՝ շատերը հասկանում են մեր այս կորուստը և կուզենային իրենց վերաբերմունքը հայտնել մեծն հայ բարերարին, բայց, ցավոք, այսօր պարզապես համացանցային կայքերից բացի՝ ուրիշ հարթակ չունեն հրապարակախոսելու համար։ Իսկ այն, ինչ որ կա, անպայման մաղվում է։ Դրա ապացույցն է էլեկտրաէներգիայի թանկացման հետ կապված բողոքի ալիքի լուսաբանումը, որը կենտրոնական հեռուստաալիքներով գրեթե չկա։
