Քիչ առաջ Ազատության հրապարակում ելույթ ունեցավ նաև ԱԺ ՀԱԿ խմբակցության անդամ Նիկոլ Փաշինյանը:
Վերջինս հիշեցրեց, որ ուղիղ 5 տարի է անցել 2008 թ. Մարտի 1-ից, հենց այդ օրն էր, որ Ռոբերտ Քոչարյանը և Սերժ Սարգսյանը տանկերով օկուպացրին ՀՀ մայրաքաղաք Երևանը, հենց այդ օրն էր, որ նրանք հասկացան, թե ինչ ուժ է ՀՀ քաղաքացու ազատասիրությունը: Ուստի, նրա կարծիքով, ժողովրդի այդ ուժը կասեցնելու համար ստիպված գործի դրեցին բանակը: «Բայց բանակը չէր, որ կանգնեցրեց մեզ, այլ սերը. մենք այնքան էինք սիրում մեր քաղաքը, որ չէինք կարող պայքարել նրա փողոցներում, այնքան ենք սիրում մեր բանակը, որ չէինք կարող պայքարել նրա դեմ»,- ասաց Նիկոլ Փաշինյանը: Նա հորդորեց ծափահարել Մարտի մեկի զոհերի ծափեր հիշատակին՝ նշելով, որ նրանք զոհվեցին, որ պայքարելու, ապրելու շանս ունենա ՀՀ հպարտ քաղաքացին:
«Այն, ինչ տեղի ունեցավ 2013 թ. փետրվարի 18-ի ընտրութուններում, հարգանքի մեծ տուրք էր 2008 թ. Մարտի մեկին: Ժողովուրդն, ի հեճուկս կանխատեսումների, չունեցավ Մարտի մեկի հույսը, չնայած Սերժ Սարգսյանի ուժերը ուղղված էին նրան, որ Մարտի մեկն արմատախխիլ անի, գիտեր, թե վերջին 5 տարիներին կերտել է լրիվ ուրիշ, նոր Հայաստանի Հանրապետություն:
Սերժ Սարգսյանն իր նախորդի տխրադեմ շարունակողն է: Ապացույցն է համալսարանում տեղի ունեցածը, երբ ռեկտորի ՀՀԿ-ական օգնականը մարտի է կանչում «ախալքալաքցիների զորքին»: Սա ամոթալի փաստ է: Սերժ Սարգսյանը փորձում է կիրառել «բաժանիր, որ տիրես» մաքիավելիական սկզբունքը: Սակայն թույլ չենք տալու դա կիրառել՝ սա մեր հայրենիքն է ու վերջ: Ես երևանցի եմ նույնքան, որքան ղարաբաղցի, ղարաբաղցի եմ նույնքան, որքան ախալքալաքցի և որպես ախալքալաքցի ասում եմ, որ չեք կարող մեզ հանել մեր ժողովրդի դեմ:
ՀՀ ժողովուրդը երբեք չի պայքարել մեկը մյուսի դեմ, այլ պայքարել է բռնության, ապօրինության, ամենաթողության դեմ: Սա պայքար է հանուն հայ ժողովրդի միասնականության, որը նշանակում է օրենքի հավասարություն»,- նշեց իր ելույթում Նիկոլ Փաշինյանը:
Նրա խոսքով՝ գալիս է միասնության, ժողովրդի, հաղթանակի ժամանակը և ժողովուրդը եկել է հաղթանակի ետևից: Նրա հավաստիացմամբ՝ բանակն ու ժողովուրդը այլևս երբեք չեն կանգնելու դեմ առ դեմ, ոստիկանությունն ու ժողովուրդը այլևս չեն դիրքավորվելու իրար դեմ, բանակը, ոստիկանությունը, ժողովուրդը կանգնելու են կողք կողքի և կերտելու են ազատ ու երջանիկ Հայաստան:
«Հաղթանակ կամ ոչինչ, հաղթանակ և ուրիշ ոչինչ»,- ասաց Նիկոլ Փաշինյանը:
Գործչի համոզմամբ՝ ժողովուրդն ընտրել է Րաֆֆի Հովհաննիսյանին, ով պետք է պաշտոնը ստանձնի ապրիլի 9-ին և ջանքերը պետք է ուղղված լինեն նրան, որ դա դե յուրե հաստատվի: Ըստ Նիկոլ Փաշինյանի՝ ինքը ոչ մի պայմանով, ոչ մի պարագայում չի հավակնում և չի լինի այդ նոր իշխանության կազմում, որ որևէ մեկն անգամ առիթ չունենա Ազատության հրապարակի ոգեղեն պայքարը ներկայացնել, որպես աթոռակռիվ:
Ուստի իր ելույթի վերջում ՀԱԿ պատգամավորը կոչ արեց ապրիլի 9-ին գնալ իր ընտրության հետևից ու հաստատել իր նախագահին: Նա ելույթն ավարտեց իր ավանդական խոսքերով. «Կեցցե՛ ազատությունը, կեցցե՛ Հայաստանի հանրապետությունը, կեցցե՛ն մեր երեխաները, որ ապրելու են ազատ ու երջանիկ Հայաստանում»: