Ադրբեջանական Salam News կայքի փոխանցմամբ, Բաքվում ԵԱՀԿ գրասենյակի ղեկավար Ալի Բիլգե Ջանկորելն ադրբեջանական լրատվամիջոցներին տված հարցազրույցի ժամանակ հայտարարել է, որ ադրբեջանական իշխանություններն ու ընդդիմությունը պետք է երկխոսության գնան` նկատի ունենալով ապրիլի 17-ին կայանալիք ընդդիմության հանրահավաքը.
«ԵԱՀԿ Բաքվի գրասենյակը արդարության և ժողովրդավարության կողմնակիցն է: Մենք ցանկանում ենք, որ բողոքի ցույցերի ժամանակ այլևս ձերբակալություններ չլինեն: Մենք անխուսափելի ենք համարում իշխանությունների ու ընդդիմության միջև երկխոսությունը:
Շատ կարևոր է, որ դա կայանա, և կողմերի համար ընդունելի որոշումներ գտնվեն: Դրա համար էլ պետք է խուսափել ակցիաների ժամանակ բռնության կիրառումից: Դա իշխանություններին ոչինչ չի տա:
Ադրբեջանում պետք է օգտագործել բոլոր հնարավորությունները խոսքի ազատության ապահովման համար: Կողմերը պետք է երկխոսության միջոցով վճռեն, թե ինչպես կարելի է հասնել դրան: Այդպիսի հարցերը պետք է հանդիսանան ոչ թե հակամարտության, այլ` երկխոսության թեմա:
Չի կարելի հաշվի առնել միայն կողմերից մեկի դիրքորոշումը: Ընդհանուր մոտեցումը պետք է համաձայնեցված լինի երկու կողմի հայացքների հիման վրա: ԵԱՀԿ-ն մշտապես պատրաստ է նմանատիպ երկխոսություններ կազմակերպելուն»:
Հիշեցնենք, որ ադրբեջանական ընդդիմությունը պլանավորել էր ապրիլի 17-ին հանրահավաք անցկացնել «Նարիմանով» կինոթատրոնի առջևի հրապարակում: Սակայն Բաքվի իշխանությունները դա մերժել են` փոխարենն առաջարկելով Բիբիեյբատեի ավտոդպրոցի հրապարակը:
Ընդդիմության կարծիքով, դա հավասարազոր է մերժման, քանի որ օրենքով սահմանված կարգով հանրահավաքի անցկացման տեղն ու ժամկետը որոշում է դրա կազմակերպիչը: