«Եթե Հայաստանում հոսանքի սակագինը բարձրանա, մենք ևս պարտավոր ենք բարձրացնել, որը և կտարածվի բնակչության վրա: Պարզապես բնակչության որոշակի խմբի համար պետության աջակցություն կլինի»,- «Առաջին լրատվական»-ի հետ զրույցում ասաց Արցախի վարչապետ Արա Հարությունյանը:
Մինչդեռ երեկ նա իր ասուլիսում, պատասխանելով էլեկտրաէներգիայի սակագնի հնարավոր բարձրացման վերաբերյալ հարցին, ասել էր. «Անկախ սակագնի հնարավոր բարձրացումից՝ բնակչությունը շարունակելու է վճարումները կատարել նույն սակագնով՝ 25 դրամով, ի տարբերություն մեծ ծավալով էլեկտրաէներգիա սպառողների: Անհրաժեշտության դեպքում ռազմավարական նշանակության օբյեկտների համար կվարվի սուբսիդավորման հատուկ քաղաքականություն»:
«Սպառողների, բնակչության բոլորի համար էլ գինը բարձրանալու է, բայց մենք ունենք սոցիալական մի խավ, որոնց համար սակագինը մնալու է նույնը: Պետությունը սուբսիդավորելու է՝ ոնց որ Հայաստանում արվում է գազի սակագնի դեպքում: Մենք էլ մեր որոշ խավերի համար, ոչ բոլորին համատարած, էլեկտրաէներգիայի սակագինը կսուբսիդավորենք»,- այսօր մեզ հետ զրույցում ասաց վարչապետը՝ հավելելով, որ այդ խումբը բավականին մեծ է:
Մեր հարցին, թե հոսանքի թանկացումը ինչպե՞ս կանդրադառնա Արցախի տնտեսության վրա, վարչապետը պատասխանեց, որ իրենք հիմա հենց այդ հարցն են քննարկում, հաշվարկներ են անում, սակայն դեռ վերջնական որեւէ կանխատեսում չունեն: «Վերջնական բան չունենք»,-ասաց նա: