Քաղաքական ճգնաժամը Կոտ դ’Իվուարում հանգեցրել է սննդամթերքի գնի աճի նրան սահմանակից Արևմտյան Աֆրիկայի որոշ երկրներում:
Գիշերը կրակահերթեր են լսվել Կոտ դ’Իվուարի հյուսիսային հարևան Բուրկինա-Ֆասոյի նախագահական նստավայրում, որը տեղակայված է երկրի մայրաքաղաք Ուագադուգույում, ինչպես նաև հարևանությամբ գտնվող կառավարական ռադիոկայանի տարածքում:
Ինչպես փոխանցում է BBC գործակալությունը, օդ են կրակել զինվորները, իսկ ապստամբության պատճառ կարող են լինել աշխատավարձերը և բնակարանների նպաստները չվճարելը:
Տուժածների մասին տեղեկություններ դեռ հայտնի չեն, սակայն հայտնի է, որ նստավայրի դարպասներից գիշերը շտապ օգնության մեքենա է դուրս եկել:
Ավելի ուշ տեղեկություն է ստացվել, որ ապստամբությանը միացել են ևս երկու զորանոց: Ապստամբներն այրել են Գլխավոր շտաբի պետի` Դյենդյերի տունը, որից հետո սկսել են թալանել հարակից տներն ու խանութները:
Որոշ տեղեկություններով, երկրի նախագահ Բլեզ Կոմպաորեն լքել է մայրաքաղաքը և թաքնվում է իր հայրենի քաղաքում:
Նշենք, որ փետրվարից երկրում տեղի են ունենում բազմահազարանոց բողոքի ցույցեր, որի մասնակիցները պահանջում են երկրի ղեկավարի հրաժարականը: Կոմպաորեն զբաղեցնում է իր պաշտոնը 1987 թվից և իր կառավարման ընթացքում բազմիցս բախվել է նման զինվորական ապստամբությունների հետ:
