Բելառուսի իշխանությունները նոր մանրամասներ են հրապարակել Միսնկի ահաբեկչության մասին: Գլխավոր կասկածյալը ծննունդով Վիտեբսկ քաղաքից է: Այս մասին հաղորդել է Բելառուսի ներքին գործերի նախարարի տեղակալ Օլեգ Պեկարսկին: Գաղտնի ծառայության աշխատակիցները հայտնաբերել են նրանց բնակվելու վայրը, երբ կասկածյալներից մեկը ոգելից խմիչք է գնելիս եղել:
Խոսելով պայթյունն իրականացնողների դրդապատճառների մասին` Պեկարսկին նշել է, որ ահաբեկիչները նպատակ են ունեցել որքան հնարավոր է շատ մարդ սպանել: Ըստ ոստիկանների` ձերբակալվածների մեջ կա նաև մեկ կին:
Մինչդեռ բելառուսցի այլախոհները մեղադրել են Բելառուսի իշխանություններին Մինսկի մետրոյի ահաբեկչությունը կազմակերպելու մեջ: Նրանց մոտ զարմանք է առաջացրել այն փաստը, որ «իրենց կաբինետներում նստած»` Բելառուսի իրավապահներին հաջողվեց «բացահայտել» հանցագործությունը: Գերմանիա փախած հատուկ ծառայությունների պաշտոնաթող գնդապետ Վլադիմիր Բորոդաչը հայտնել է, որ Բելառուսի իշխանություններն ավելի շատ ցնծության մեջ են, քան սգի:
Գնդապետի համար ակնհայտ է, որ այսօրինակ հանցագործության բացահայտման համար անհրաժեշտ է շատ ժամանակ և ապացույցներ. «Ակնհայտ է, որ նշմարվում է մի ընդհանուր սցենար բարձրաստիճան պաշտոնայների մասնակցությամբ», ասել է Բորոդաչը:
Հիշեցնենք, որ Белорусский партизан և Хартия’97 ընդդիմադիր կայքերը, որոնք տպագրել էին այս հանցագործության իրենց տարբերակները, փակվել էին Բելառուսի իշխանությունների կողմից: Այս մասին հաղորդում է RBC-ն:
Այսօր նաև հատնի է դարձել, որ հիվանդանոցում մահացել է պայթյունից հետո ծանր վնասվածքներ ստացած վիրավորներից մեկը:
