Սուր աչք ունեցողները նկատած կլինեն, որ ամերիկյան ֆուտբոլի New England Patriots ակումբի (Բոստոն, Մասաչուսեթս) գլխավոր մարզիչ Բել Բելիչիքը Սուպեր գավաթի խաղարկությունում իրենց հաղթանակի կապակցությամբ Սպիտակ տանը կատարված ընդունելության ժամանակ կրել է հայկական դրոշ պատկերող կրծքանշան։ Այս մասին գրում է Nesn.com-ը։
Կրծքանշան կրելու նրա ընտրությունը կատարվել է Հայոց ցեղասպանության 100-րդ տարելիցից 1 օր առաջ։ Նա ծագումով հայ չէ, սակայն ունի կրծքանշանը կրելու պատճառ։
Ըստ Armenian Mirror-Spectator պարբերականի՝ Բելիչիքը կրել էր այն ակումբի գործադիր տնօրեն Պերճ Նաջարյանի պահանջով, ում պապը Ցեղասպանությունը վերապրածներից է։
«Դա խնդիր չէր»,- ասել է Նաջարյանը Ուոթերթաունում Սենթ Ջեյմս տղամարդկանց ակումբում ելույթի ժամանակ՝ կրծքանշան կրելու հարցում Բելիչիքին խնդրելու վերաբերյալ։ «Նա ճանաչում էր կրծքանշանը, ես պատմել եմ նրան իմ պապի մասին, իմ պատմության մասին այստեղ՝ Ուոթերթաունի «Հայաստան» ճամբարում, և ամեն ինչ»,- ասել է Նաջարյանը։
Սակայն Նաջարյանը դրանով կանգ չի առել։ Երբ Բելիչիքի աջ ձեռքը հանդիսացող մարդը հանդիպել է Օբամային ընդունելության ժամանակ, նա հույս է հայտնել, որ նախագահը կճանաչի Ցեղասպանությունը տարելիցի առիթով պաշտոնական հայտարարության ժամանակ։
Սպիտակ տունն այդ շաբաթ ավելի վաղ հայտարարել էր, որ Օբաման կոգեկոչի ոճրագործության տարելիցը, սակայն կխուսափի այն ցեղասպանություն անվանելուց։ «Բարդ հարց է,- պատասխանել է Օբաման։- Ես փորձում եմ կանխել ապագա ցեղասպանությունները»։ Նաջարյանը վերջին խթանն է տվել՝ հարցնելով. «Ի՞նչ կասեք Պապի մասին»
«Պապը չունի կառավարություն, որպեսզի վարվի՝ ինչպես ես»,- պատասխանել է Օբաման։
Նաջարյանը կիրառել է եզակի հարթակն ու գլխավոր մարզչի փոքրիկ օժանդակությունը՝ խիզախորեն լսելի դարձնելու իր ձայնը։ Նա խոստովանել է, որ այդ պահն ինքը երբեք չի մոռանա։ «Սպիտակ տանն այդ 40 վայրկյանները բավականին առանձնահատուկ էին»,- ասել է նա։
