Թուրքիան կընդունի Ուկրաինայից փախստականներին, ովքեր ստիպված են եղել բախումների հետևանքով լքել իրենց տները: Այդ մասին հայտնել է Թուրքիայի նախագահ Ռեջեփ Թայիփ Էրդողանը Արդահան կատարած այցի ժամանակ՝ փոխանցում է TRT Haber հեռուստաալիքը:
Նախագահի խոսքով՝ Թուրքիան Ուկրաինայից ժամանած ավելի քան 600 ընտանիքների կտրամադրի ապրելու համար բոլոր պայմանները: Սակայն Էրդողանը չի նշել, թե Ուկրաինայի որ շրջանից կընդունեն փախստականներին:
Ավելի վաղ Թուրքիայի արտաքին գործերի նախարար Մևլութ Չավուշօղլուն ասել էր, որ Թուրքիան ուսումնասիրում է Ղրիմի թաթարների վիճակը, և որ Ռուսաստանը նրանց նկատմամբ չի կատարում իրենց խոստումները:
Ռուսաստանը Թուրքիային խոստացել էր թաթարերենին տալ պետական լեզվի կարգավիճակ, սակայն չի կատարել իր խոստումը՝ ասել է Չավուշօղլուն: Նրա խոսքով՝ Ռուսաստանը խոստացել է նաև, որ թաթարները կներկայացվեն պետական մարմիններում, սակայն դա էլ տեղի չի ունեցել: Այդպիսի խոստումներ Ռուսաստանի նախագահը տվել էր անցյալ տարվա դեկտեմբերի 1-ին Անկարա կատարած այցի ժամանակ:
