Թուրքիայի արևելքում գտնվող Դիարբեքիր քաղաքում քրդամետ Ժողովրդադեմոկրատական կուսակցության հանրահավաքի ժամանակ երկակի պայթյունի և քաղաքում սկսված անկարգությունների հետևանքով տուժածների թիվը հասել է 150-ի: Հայտնի է 2 զոհի մասին: Այս մասին գրում է RIA Novosti-ն` վկայակոչելով Առողջապահության քաղաքային դեպարտամենտին:
Այժմ քրդամետ կուսակցության մի քանի հազար կողմնակիցներ հավաքվել են քաղաքում՝ կուսակցության գրասենյակի մոտ՝ տարերային հանրահավաքի: Կուսակցության առաջնորդ Սալահեթին Դեմիրթաշը կոչ է արել հանգստություն պահպանել:
«Նրանք ցանկանում են կանգնեցնել մեզ: Իսկ մեզ ընդամենը խաղաղություն է պետք: Եվ խաղաղությունը կգա այս երկիր՝ նույնիսկ չնայած այն բանի, որ նրանք փորձում են դա կանգնեցնել»,- հայտարարել է Դեմիրթաշը:
«Մարդասպաններ, մարդասպաններ»,- վանկարկում են հավաքվածները: Նրանք նաև վիրավորական կարգախոսներ են վանկարկում իշխանությունների հասցեին:
