Հունիսի 2-ին անցկացված՝ «Կենսաբանություն», «Ընդհանուր պատմություն», «Աշխարհագրություն» առարկաներից միասնական քննությունների արդյունքները կփակցվեն կիրակի օրը, և դիմորդներից յուրաքանչյուրը հնարավորություն կունենա արդեն պաշտոնապես տեղեկանալ իր գնահատականների մասին և անհրաժեշտության դեպքում՝ բողոքարկել: Այս մասին լրագրողների հետ զրույցում նշեց Գնահատման և թեստավորման կենտրոնի տնօրեն Գագիկ Մելիքյանը:
Նա ընդհանուր ներկայացրեց քննության արդյունքների նախնական պատկերը: «Կենսաբանություն» առարկայից առավելագույն 20 միավոր է ստացել քննություն հանձնած 1356 դիմորդների 4.4 տոկոսը՝ շուրջ 60 դիմորդ: Անբավարար է ստացել քննություն հանձնածների 20 տոկոսը կամ՝ ավելի քան 271 դիմորդ, միջին միավորը այս տարի 12.9-ն է։
«Կենսաբանություն» առարկայի մասով փոքր-ինչ փոփոխություն կա. առարկայից քննություն հանձնող դիմորդների թիվը ավելացել է մոտ 120-ով: Սա կարող է պայմանավորված լինել տարբեր գործոններով։ «Դիմորդներ կան, որոնք նշում են, որ այս թեստերն ավելի հեշտ են, քան «Ֆիզիկա», «Քիմիա» առարկաներինը, դիմորդներ կան հակառակն են նշում. ուղղակի առարկայի թեստերում հիշողության վրա հիմնված առաջադրանքներ շատ կան»,- նշեց նա:
«Աշխարհագրություն» առարկայից հունիսի 2-ին քննություն է հանձնել 319 դիմորդ, նրանցից 10-ը ստացել է 20 միավոր: Անբավարար ստացողների թիվը 29-ն է: «Ընդհանուր պատմությունից» ամենաբարձր՝ 20 միավոր է ստացել 129 մասնակիցներից 2-ը: Անբավարար գնահատական է ստացել քննություն հանձնածների 13.9 տոկոսը:
Գագիկ Մելիքյանը նաև նկատեց, որ հունիսի 2-ի քննության ընթացքում ոչ մի դիմորդի մոտ հեռախոս չեն հայտնաբերել, ծածկագրեր՝ ևս, այնինչ նախորդ տարիներին դիմորդները դիմում էին տարբեր հնարամտությունների։ «Դրան նպաստել է խստացված կարգը, որի մասին լրատվամիջոցների միջոցով դիմորդները տեղեկացված են եղել»,- նշեց նա
Մանրամասները՝ տեսանյութում։
