Նոր պատրիարքի ընտրությունը Թուրքիայի հայկական համայնքի առաջնորդների և հոգևորականության պառակտման պատճառ է դարձել։ Այս մասին հայտնում է The Daily Sabah-ը։
Պոլսո Հայոց պատրիարքարանի առաջնորդ Մեսրոպ II Մութաֆյանը 2008 թվականից գտնվում է վեգետատիվ վիճակում՝ դեմենցիայի ախտորոշումից հետո։ Արքեպիսկոպոս Արամ Աթեշյանը պատրիարքարանի գործող ղեկավարն է, սակայն համայնքը շարունակաբար նոր պատրիարքի ընտրության կոչ է անում։ Աթեշյանը խոստացել էր ընտրությունն անցկացնել անցած տարի, սակայն եպիսկոպոսական խորհուրդը՝ սինոդը, չէր կարողացել կոնսենսուսի հասնել։
Պետրոս Շիրինօղլուն՝ Եդիկուլե շրջանի Սուրբ Փրկիչ հիվանդանոցի հիմնադրամի նախագահը, ով ներկայացնում է հայկական համայնքը, արդար ընտրության կոչ է արել։ «Ժամանակն է, որպեսզի ընտրություն անցկացվի։ Չեք կարող 7 տարի պատրիարքարանի պաշտոնակատար ունենալ»,- ասել է նա։
Բժիշկների խոսքով՝ 59-ամյա Մեսրոպ II-ի ապաքինման շանսերը գրեթե զրոյական են։
Թուրքական օրենքն արգելում է նոր պատրիարքի ընտրությունը, քանի դեռ նախորդը ողջ է։ Կառավարությունը բացառում է նոր պատրիարքի ընտրությունը, սակայն մի խումբ հայեր հայց են ներկայացրել ՆԳՆ՝ ընտրությունն արգելակող կանոնակարգումները վերացնելու համար։ Իրավական գործընթացն ընթացքի մեջ է։
