Թուրքական Taraf թերթի փոխանցմամբ, հունիսի 12-ին կայանալիք խորհրդարանական ընտրություններից առաջ երկրի գլխավոր ընդդիմադիր ուժ հանդիսացող և քեմալական ուղղությունը ներկայացնող «Ժողովրդա-հանրապետական» կուսակցությունը (ԺՀԿ) պատրաստել է «Հարավ-արևելք» բրոշյուրը:
Այն սկսվում է հետևյալ արտահայտությամբ. «Արևելքն ու հարավ-արևելքն օրվա երես կտեսնեն: Բոլորը հանգիստ շունչ կառնեն»: Դրանով նախատեսվում է արմատական բարեփոխումներ իրականացնել Թուրքիայի հարավ-արևելյան շրջաններում, ուր գլխավորապես ապրում են քրդեր.
ա) արևելքի և հարավ-արևելքի նկատմամբ ճնշումների վերացում և համընդհանուր խաղաղության հաստատում
բ) «Քրդական հարցի» միայն ժողովրդավարական կարգավորում
գ) խորհրդարան մուտք գործելու համար քաղաքական կուսակցություններից պահանջվող նախընտրական 10 տոկոսանոց արգելքի նվազեցում
դ) չլուծված խնդիրների և անհետ կորածների վերաբերյալ հանձնաժողովների ստեղծում, մեղավորների պատժում
ե) ԵԽ-ի պահանջով տեղական ինքնակառավարման մարմինների բարեփոխում
զ) հատուկ լիազորություններ ունեցող դատարանների վերացում
է) 1980 թվականի սեպտեմբերի 12-ին Թուրքիայի պատմության մեջ տեղի ունեցած ամենաարյունալի ռազմական հեղաշրջման մեղավորներին պատժելու ճանապարհին ընկած արգելքների վերացում
ը) որպես համընդհանուր խաղաղության վառ օրինակ` Դիարբեքիրի բանտի վերածում թանգարանի
թ) «Գյուղական պահապանների» համակարգի վերացում
ժ) մայրենի լեզվով ուսուցման թույլտվություն, մշակութային ձուլման վերացում, մշակութային արժեքների նկատմամբ հարգանքի ցուցաբերում
ի) մինչև 2023 թվականը (Թուրքիայի Հանրապետության հիմնադրման հարյուրամյակը) արևելքում ու հարավ-արևելքում 9.5 տոկոսանոց տնտեսական աճի արձանագրում (Թուրքիայում 7 տոկոս)
Հարկ է նշել, որ ԺՀԿ-ի այս խոստումները բացառապես պայմանավորված են մոտեցող խորհրդարանական ընտրություններով: Քեմալական ավանդույթների պահապան հանդիսացող ԺՀԿ-ն քրդերի (նաև հայերի) հանդեպ շատ ավելի խիստ դիրքորոշում ունի, քան վարչապետ Էրդողանի գլխավորած «Արդարություն ու զարգացում» կուսակցությունը (ԱԶԿ):
Պետք է հիշել, որ երբ 2009 թվականի աշնանը թուրքական խորհրդարանը քննարկում էր վարչապետ Էրդողանի առաջ քաշած «Քրդական նախաձեռնությունները» (բարեփոխումները), ագրեսիվ վարքով աչքի ընկավ ԺՀԿ տվյալ ժամանակվա փոխնախագահ Օնուր Օյմենը, ով հայտարարեց, որ ներկայումս քրդական հարցը պետք է լուծել այնպես, ինչպես 1937–1938 թվականներին Դերսիմի կոտորածների ժամանակ:
Դրանից հետո նրան անվանեցին ֆաշիստ և նմանեցրին Հիտլերին, սակայն Օյմենը հայտարարեց. «Ես, իհարկե, չեմ ընդունում, երբ ինձ Հիտլերի հետ են նույնացնում: Ե՞ս եմ ճնշել Դերսիմի ապստամբությունը: Մի՞թե ֆաշիստ էր նաև Դերսիմի ապստամբությունը ճնշած Աթաթուրքը»:
