Աստղակենսաբանների միջազգային խումբը պարզել է, որ որոշ երկրային մեթանածին մանրէներ կարող են ոչ միայն դիմանալ Մարսի չափազանց ցածր ջերմաստիճանին, այլև օդի չափազանց փոքր ճնշմանը՝ երկրայինից հարյուրավոր անգամներ ցածր: Այս մասին հայտնում է RIA Novosti-ն՝ հղում անելով Արկանզասի համալսարանի մամլո ծառայությանը:
«Այդ օրգանիզմները Մարսի վրա կյանքի առաջին ներկայացուցիչների դերի համար իդեալական թեկնածու են: Բոլոր մեթանածին մանրէները ողջ են մնացել ցածր ճնշման պայմաններ տեղափոխվելուց հետո, և շարունակել են մեթան անջատել ամեն փորձից և մի միջավայրից մյուսը տեղափոխվելուց հետո: Մեր աշխատանքը մեծ քայլ է առաջ՝ ստուգելու արդյոք նման միկրօրգանիզմներ գոյություն ունե՞ն Մարսի վրա, կամ դրանք կարո՞ղ են արդյոք այնտեղ գոյություն ունենալ»,- հայտարարել է Ռեբեկա Միքոլը Արկանզասի համալսարանից:
Գիտնականները բացատրում են, որ վերջին տարիներին մասնագետները վիճում են՝ արդյոք մանրէներ գոյություն ունե՞ն Մարսի հողի մակերևույթին մոտ շերտերում, որտեղ հեղուկ ջուր կա, ուր գրեթե չեն թափանցում տիեզերական շողեր, և որտեղ համեմատաբար տաք է:
Միքոլն ու նրա գործընկերները ներկայացրել են նոր վկայություններ, որ մանրադիտակային կյանք սկզբունքորեն կարող է գոյություն ունենալ Մարսի վրա:
Գիտնականները փորձերի ընթացքում ստուգել են՝ արդյոք մանրէները կկարողանա՞ն դիմանալ ջերմաստիճանների կտրուկ անկմանը, ցրտին, հալոցքին, օդի ճնշման անկմանը մինչև Մարսի նիշ:
Փորձերը ցույց են տվել, որ մանրէները ոչ միայն ողջ են մնացել, այլև շարունակել են նորմալ սննդանյութեր վերամշակել և մեթան անջատել: Դա վկայում է այն մասին, որ դրանք լիովին հարմարվել են նոր պայմաններում կյանքին և շարունակել գոյատևել:
