ԵՄ-ում Ուկրաինայի ներկայացուցչության ղեկավար Կոնստանտին Ելիսեևը հանդես է եկել Հայաստանի, Ադրբեջանի, Բելառուսի՝ ԵՄ-ի «Արևելյան գործընկերություն» քաղաքականությունից անջատվելու օգտին: ՈՒՆԻԱՆ-ի հաղորդմամբ՝ այս մասին Ելիսեևը հայտարարել է 8-րդ Կիևյան ֆորումի շրջանակներում: Դիվանագետը նշել է քաղաքականությունը, որին Վրաստանը, Ուկրաինան և Մոլդովան կարող են հետևել արտաքին սպառնալիքներին դիմակայելու գործում:
«Առաջին՝ մենք կարող ենք ապահովել տարանջատման քաղաքականություն «Արևելյան գործընկերության» շրջանակներում: Կարծում եմ՝ արդեն ժամանակն է երեք երկիր՝ Ուկրաինան, Վրաստանը և Մոլդովան անջատել Հայաստանից, Ադրբեջանից, Բելառուսից: Մենք փորձել ենք դա անել, ի դեպ, Ռիգայի գագաթնաժողովում, մենք համաձայնեցված եռակողմ հայտարարություն ունեինք Ուկրաինայի, Վրաստանի և Մոլդովայի վերաբերյալ: Այսինքն՝ հստակ տարանջատում»,- նշել է Ելիսեևը:
Հիշեցնենք, որ 2009 թ. մայիսին մեկնարկած «Արևելյան գործընկերություն» ծրագրի մեջ մտնում են Հայաստանը, Վրաստանը, Ադրբեջանը, Մոլդովան, Ուկրաինան և Բելառուսը: Ծրագրի նպատակն է այս պետությունների քաղաքական և տնտեսական մերձեցումը Եվրամիության պետությունների հետ:
