«Դուքենդո» ֆեդերացիայի նախագահ Գոռ Վարդանյանը չի կարծում, որ քրեական աշխարհում հայտնի Թևոսիկի եղբոր՝ Արթուր Սաֆարյանի սպանության դեպքը չի ազդել իր ֆեդերացիայի գործունեության ու հեղինակության վրա:
Հիշեցնենք, որ Արթուր Սաֆարյանի սպանության մեջ մեղադրվող Իսրայել Սարգսյանը աշխատում էր «Դուքենդո» ֆեդերացիայում, և այդ դեպքերից հետո ֆեդերացիայում իրականացված ստուգումների արդյունքում մեծ քանակությամբ զենք-զինամթերք հայտնաբերվեց:
«Ամեն ինչ նորմալ ա, ոչ մի բան էլ չի եղել: Մենք ինչ ենք արել որ: Իսոն ներկայումս նախաքննության մեջ է: Եվ երբ դատարանը որոշի, որ նա քրեորեն վտանգավոր գործ է արել, կպատժվի: Իսկ ֆեդերացիան հազարավոր տղաներ ունի, և մենք բոլորի փոխարեն չենք կարող պատասխան տալ: Մի նայեք վատ արարքներին: Բազմահազար տղաներ կան, որ էս ժամանակահատվածում մեր Հայաստանի անունը բարձր են պահել»,- ասաց Վարդանյանը:
Մեր հարցին՝ ճի՞շտ է, որ ինքը նախկին նախագահ Ռոբերտ Քոչարյանի հետ շատ մտերիմ է, Վարդանյանը պատասխանեց. «Քաղաքական հարցեր մի տվեք: Ես բոլորի հետ մտերիմ եմ: Ես հայ եմ ու մտերիմ եմ բոլոր հայերի հետ»:
