«Երկու ջևիկ երեխա անլվա ելակ են կերել, սկսել ա բռնկումը». Արմավիրի քաղաքապետը հերքում է առողջապահության նախարարությանը

Արմավիրի քաղաքապետ Ռուբեն Խլղաթյանի միտքն այսօր կրկին փայլատակեց, երբ «Առաջին լրատվական»-ը հարցրեց տասն օր առաջ Արմավիրի մանկապարտեզներում բռնկված վարակի մասին, որի հետևանքով հոսպիտալացվել են երեխաներ, իսկ մանկապարտեզը ժամանակավորապես փակվել է:

Քաղաքապետը մանկապարտեզներում վարակի աղբյուրին, սանիտարահիգիենիկ ոչ բավարար պայմաններին ու դրանց պատասխանատուներին անդրադառնալու փոխարեն՝ այնպիսի ինքնավստահությամբ հարձակվեց՝ պնդելով, որ նման բան տեղի չի ունեցել, որ կարելի էր կասկածի տակ դնել առողջապահության նախարարության տարածած պաշտոնական հաղորդագրությունը:

Նա փորձեց իր տեսանկյունից մեկնաբանել տեղի ունեցածը՝ այն վերածելով զավեշտի: Պարզվում է՝ երկու երեխա ընդամենը այլ վայրում ելակ են կերել, որից հետո հաճախել մանկապարտեզ, և սկսվել է «բռնկումը»: Ըստ քաղաքապետի՝ ստացվում է, որ դրսում ելակից թունավորվածները օդակաթիլային ճանապարհով վարակել են մանկապարտեզի մյուս սաներին։

Հիշեցնենք, որ ըստ ԱՆ-ի հաղորդագրության՝ մայիսի 18-ին Արմավիր բժշկական կենտրոնի ինֆեկցիոն բաժանմունք են հոսպիտալացվել 3-6 տարեկան երեխաներ: Բոլորի մոտ նկատվել են նույն ախտանշանները՝ լուծ, փսխում, ջերմություն և ընդհանուր թուլություն։ Բոլոր երեխաները հաճախում են Արմավիր քաղաքի թիվ 9 և թիվ 6 մանկական նախադպրոցական կազմակերպություններ:

…Մայիսի 22-ի դրությամբ Արմավիրի և Մեծամորի բժշկական կենտրոնների ինֆեկցիոն բաժանմունքներում հոսպիտալացված է միջին ծանրության 16 հիվանդ: Հիվանդների վիճակը բավարար է, ունեն առողջացման դրական տեղաշարժ:
Համաճարակաբանական հետազոտության արդյունքում բացահայտվել է, որ Արմավիր քաղաքի թիվ 9 և 6 մանկապարտեզներում առկա է տեղային (լոկալ) բռնկում, քանի որ հիվանդության դեպքերն արձանագրվել են գրեթե միաժամանակ, լաբորատոր հետազոտությունների արդյունքում հայտնաբերված շիգելլա զոնեն բնորոշ է սննդային գործոնին: Հետևաբար՝ համաճարակաբանական օրինաչափությունների և լաբորատոր հետազոտությունների արդյունքում կարելի է եզրակացնել, որ արձանագրվել է սննդային գործոնով պայմանավորված տեղային (լոկալ) բռնկում՝ երկրորդային աղտոտվածության հետևանքով:

Դեպքերի մասին տեղեկացվել են ինչպես տարածքային կառավարման և համայնքների ղեկավարները, այնպես էլ ՀՀ գյուղատնտեսության նախարարությունը։

Ավելին՝ տեսանյութում։