ՀՀ ԳԱԱ հայագիտության և հասարակական գիտությունների բաժանմունքի 2010 թ. գիտական գործունեության արդյունքները այսօր ԳԱԱ տարեկան ընդհանուր ժողովի ընթացքում կամփոփի բաժանմունքի ակադեմիկոս-քարտուղար, ՀՀ ԳԱԱ ակադեմիկոս Վլադիմիր Բարխուդարյանը:
Նշենք, որ ԳԱԱ հայագիտության և հասարակական գիտությունների բաժանմունքն իր կազմում ընդգրկում է պատմության, տնտեսագիտության, փիլիսոփայության, սոցիոլոգիայի և իրավունքի, լեզվի, գրականության, արևելագիտության, հնագիտության և ազգագրության, արվեստի ինստիտուտները, Հայոց ցեղասպանության թանգարան-ինստիտուտը, Շիրակի հայագիտական հետազոտությունների կենտրոնը:
Ինչպես տեղեկացնում է ԳԱԱ տեղեկատվական-վերլուծական կենտրոնը, բաժանմունքի հիմնարկների գիտաշխատողները հրատարակել են 132 գիրք: Մասնավորապես, հրատարակվել են Վլ. Բարխուդարյանի «Մոսկվայի և Պետերբուրգի հայկական գաղութների պատմություն (XVIII դարի կես – XX դարի սկիզբ)», Ա. Հակոբյանի «Խորհրդային Հայաստանը Մոսկվայի և Կարսի պայմանագրերում», Ն. Հովհաննիսյանի «Արմենոցիդը ճանաչված ցեղասպանություն է», Ռ. Սաֆրաստյանի «Ottoman Empire: The Genesis of the Program of Genocide», Վ .Հարությունյանի և Վ. Խաչատրյանի «Ճգնաժամ. Մակրոտնտեսական իրավիճակն աշխարհում և Հայաստանում», Լ. Հովհաննիսյանի «Գրաբարի բառարան. Նոր հայկազյան բառարանում չվկայված բառեր», Վ. Համբարձումյանի «Լատինաբան հայերենի պատմություն (14-18-րդ դդ.)», Հ. Հովհաննիսյանի «Հնագույն դրաման Հայաստանում. ծագման հարցի շուրջ» և այլ մենագրություններ, Ա. Աղասյանի «Երվանդ Քոչար» և «Վարդգես Սուրենյանց /1860-1921/” ալբոմները, Հովհաննես Թումանյանի կյանքի և ստեղծագործության տարեգրությունը (1869-1908): Հ. Գևորգյանի «Философия. Наука. Культура» աշխատությունը, որը նվիրված է տրամաբանության, մեթոդաբանության, փիլիսոփայական գիտության հիմնախնդիրներին:
Հայկական լեռնաշխարհի մ.թ.ա. IX-IV հազարամյակների (Հնագույն Հայաստան) պատմության և մշակույթի վերակազմության, պարբերացման և առանձին փուլերի ժամանակագրական սահմանների հստակեցման առումներով բացառիկ արդյունքներ են ստացվել Արենի 1 քարայրի պեղումների շնորհիվ: Արտերկրի տարբեր լաբորատորիաներում կատարված Արենիի նյութերի անալիզների շնորհիվ հստակեցվել են էնեոլիթի վերջին փուլի ժամանակագրական սահմանները` մ.թ.ա. 4300-3400 թթ.: Արենին ներկայումս համարվում է Հարավարևմտյան Ասիայի` քաղաքակրթության նախաշեմին գտնվող հասարակությունների ուսումնասիրության բացառիկ օբյեկտ (հայ-ամերիկյան-իռլանդական համատեղ ծրագիր):
Պետական նպատակային ծրագրով իրականացվել են «Հայոց պատմություն» ռուսերեն երկհատորյակի և «Հայաստանի հարակից երկրների պատմություն» քառահատորյակի նախապատրաստման աշխատանքները: Հրատարակվել է «Հայոց պատմություն» քառահատորյակի 4-րդ հատորի առաջին գիրքը:
2010 թ. անցկացվել է բաժանմունքի 8 ընդհանուր ժողով, որոնցում լսվել են գիտական զեկուցումներ, քննարկվել գիտակազմակերպական բնույթի հարցեր: Մասնավորապես, քննարկվել են «Լեզվի մասին» ՀՀ օրենքում փոփոխություններ կատարելու մասին» ՀՀ օրենքի նախագծի վերաբերյալ բաժանմունքի եզրակացության նախագիծը և «Երևանի Աբովյան և Տերյան փողոցներին հարակից զբոսայգում ակադեմիկոս Վ. Համբարձումյանի արձանի անմիջական հարևանությամբ սրճարաններ ու ռեստորան կառուցելու մասին» հարցը:
