Euronews.net կայքի փոխանցմամբ, ԵԽԽՎ գարնանային նստաշրջանի մասնակիցներն ապշել են Թուրքիայի վարչապետ Էրդողանի ելույթից: Նրանք փորձում են հասկանալ՝ արդյո՞ք Էրդողանը գիտակցաբար բանավիճային հարձակման է անցել, թե՞ պարզապես անզգույշ արտահայտություն է գործածել:
Իր ելույթում Էրդողանը կոշտ քննադատության է ենթարկել Ֆրանսիային կրոնական անհանդուժողականության համար, քանի որ այդ երկրում արգելք էր դրվել մուսուլմանական հանդերձանքի մի շարք տիպեր կրելու վրա:
Ֆրանսիական խորհրդարանականն իր հերթին նույն կրոնական անհանդուրժողականության համար պատասխան քննադատության էր ենթարկել Թուրքիային:
Սակայն Էրդողանը չէր համաձայնել դրա հետ` հակադարձելով. «Դուք խոսում եք մի բանի մասին, որից տեղյակ չեք: Մեզ մոտ` Թուրքիայում, անիմաստ (անտեղի) խոսող մարդուն անվանում են ֆրանսիացի»:
Այստեղ ամենաուշագրավն այն է, որ ԵԽԽՎ-ում Ֆրանսիայի ներկայացուցիչներից Ժան Կլոդ Մինյոնը հայտարարել է, թե Էրդողանի հետ բանավեճի մեջ մտած ֆրանսուհին ունի թուրքական ծագում:
Հիշեցնենք, որ երեկ Էրդողանը նաև հանդիպում էր ունեցել ֆրանսաբնակ թուրքերի հետ և հանդիպման ժամանակ, խոսելով Լիբիայում տիրող իրավիճակից, առանց կոնկրետ անուններ նշելու, Ֆրանսիայի նախագահ Նիկոլա Սարկոզիին նմանեցրել էր ավազակի.
«Մեր գործելաոճը տարբերվում է նրանցից, ովքեր ավազակի նման ընկած են ավարի հետևից։ Նրանք, ովքեր, անձնական ամբիցիաներից ելնելով, փորձում են կարևոր դերակատարություն ունենալ Հյուսիսային Աֆրիկայում և, մասնավորապես, Լիբիայում, և որոնք մոտեցող ընտրությունների պատճառով ցանկանում են խաղալ տարածաշրջանի ճակատագրի հետ, պատասխան են տալու պատմության առջև: Լիբիան ոչ մի երկրի համար փորձադաշտ չէ»:
