«Ազատություն» ռադիոկայանի հայկական ծառայությունը հայտնում է, որ «Ազատություն» ռադիոկայանը երեկ պաշտոնապես փակել է ադրբեջանական ծառայության Բաքվի գրասենյակը։
Ադրբեջանի իշխանություններն անցած տարվա դեկտեմբերին կասեցրել են գրասենյակի աշխատանքը։ «Ազատություն» ռադիոկայանի գլխավոր խմբագիր Նենադ Պեյիչը երեկ հայտարարել է, որ «Ադրբեջանի իշխանությունների կամայական գործողությունները ծանր և որոշ դեպքերում անդառնալի ցավ ու վնաս են պատճառել աշխատակիցներին և նրանց ընտանիքներին»։
Պեյիչի փոխանցմամբ, «Ազատություն» ռադիոկայանը պատրաստվում է ձեռնարկել Ադրբեջանի կառավարության գործողություններից իր և իր աշխատակիցների օրինական իրավունքները և շահերը պաշտպանելու անհրաժեշտ միջոցներ։
Իշխանությունը ոչ միայն արգելափակել է «Ազատության» Բաքվի գրասենյակն, այլև անտեսելով իրավական ընթացակարգը` առգրավել է գույքը, տեխնիկական սարքավորումները, փաստաթղթերը, բերման է ենթարկել գրասենյակի աշխատակիցներին, նրանց զրկել է փաստաբանների հետ կապ պահպանելու հնարավորությունից, սպառնալիքներ է հնչեցրել աշխատակիցների և նրանց մտերիմների հասցեին, արգելել է որոշ աշխատակիցների ազատ տեղաշարժը։
Նենադ Պեյիչը հավելել է, որ «Ազատություն» ռադիոկայանի ադրբեջանական ծառայությունը, որը հայրենիքում հայտնի է իբրև «Ռադիո Ազատլիկ», այնուամենայնիվ, շարունակում է թողարկել լուրեր և հաղորդումներ և ի հեճուկս գրասենյակի փակմանը, հեռարձակվում է թվային և արբանյակային միջոցներով։
