Ռուսաստանում Ադրբեջանի դեսպան Փոլադ Բյուլբյուլօղլին հինգշաթբի օրը «Ռոսիա-24» հեռուստաալիքին տված հարցազրույցում հստակ նշել է Եվրասիական տնտեսական միության (ԵՏՄ) հետ կապված` պաշտոնական Բաքվի դիրքորոշումը: Նա, մանսավորապես, խոսել է Լեռնային Ղարաբաղի հակամարտության մասին՝ նշելով, որ ադրբեջանական կողմը Ռուսաստանի միջնորդության հարցում մեծ ակնկալիք ունի:
Բյուլբյուլօղլին նշել է, որ Ռուսաստանը ամենամեծ, ամենալավ զինված, ամենահարուստ, ամենահեղինակավոր երկիրն է, և նրա դիրքորոշումից ու ազդեցությունից շատ բան է կախված:
«Բաքուն սկզբունքորեն դրականորեն է վերաբերվում Եվրասիական տնտեսական միության ստեղծմանը, քանի որ դա մեր ընդհանուր տարածքն է և շատ մեծ շուկա: Բայց այսօր մենք չենք կարող անդամակցել ԵՏՄ-ին, քանի դեռ լուծված չէ Լեռնային Ղարաբաղի հակամարտության հարցը: Այդ հարցը կարող է դրվել միայն ԼՂ հակամարտության լուծումից հետո»,- ասել է Ադրբեջանի դեսպանը:
Նույն օրը` Կրեմլում տեղի ունեցած արարողության ժամանակ, Ռուսաստանի նախագահ Վլադիմիր Պուտինը Ադրբեջանի դեսպանին պարգևատրել է Պատվո շքանշանով: Պարգևատրվել են նաև չորս տասնյակ մարդիկ՝ գիտնականներ, արվեստի գործիչներ, դիվանագետներ, տիեզերագնացներ, կրոնական առաջնորդներ, գործարարներ:
