«Ժառանգության» կուսակցության առաջնորդ Րաֆֆի Հովհաննիսյանի հարցազրույցը Lenta.ru կայքին:
– Ուրբաթ օրն Ազատության հրապարակում շատերը Ձեզնից արմատական կոչեր էին ակնկալում, բայց Դուք բավարարվեցիք բավականին նուրբ հայտարարություններով:
Ինչո՞ւ:
– Մենք կարծում ենք, որ Հայաստանը նախընտրում է իր ճակատագիրը, իր սահմանադրությունը, իր իրավունքը վերցնել իր ձեռքը: Ոչ թե որ Րաֆֆիին սիրում են, իսկ Սերժին ատում, այլ որովհետև «Ժառանգություն»-ը ցույց տվեց, որ պահպանում է քաղաքացիական իրավունքը, օրենքի իշխանությունը: Մենք հաղթեցինք Երևանում, Գյումրիում, Վանաձորում, բոլոր մեծ քաղաքներում, անգամ՝ գյուղերում: Հաղթեց ժողովուրդը, ոչ թե Րաֆֆին:
– Իսկ կտրուկ քայլերի կարիք չկա՞:
– Դուք ուզում եք, որ նախագահը լքի՞ իր աթոռը:
– Ես չէ, ժողովուրդն է ուզում:
– Ես խորապես հարգում եմ Սերժ Սարգսյանին, նա Ղարաբաղյան շարժման առաջնորդներից է, բայց արտաքին ու ներքին քաղաքականության մեջ նա աններելի սխալներ է թույլ տվել:
– Դուք պատրաստվո՞ւմ եք ժողովրդին տանել նախագահական նստավայրի դեմ ցույցի:
– Եթե պետք լինի ես ինքս մի անգամ էլ կգնամ, եթե նա ինձ ասելիք ունենա: Ես նրան առաջարկեցի փոխզիջումների գնալ, նա մերժեց:
– Իսկ նա ձեզ որևէ փոխզիջում առաջարկե՞լ է, ասենք` պաշտոն:
– Ոչ, ոչ, ոչ, մենք դա չենք քննարկել, ես էլ չեմ առաջարկել:
– Ինչպե՞ս եք փորձում պայքարել:
– Մենք կգնանք քաղաքից քաղաք, գյուղից գյուղ և Հայաստանը կվերադարձնենք ժողովրդին: Իշխանությունը պիտի հասկանա, որ ժողովրդի շնորհավորանքներն ավելի կարևոր են, քան Վլադիմիր Պուտինի կամ Ֆրանսիայի նախագահի: