ԱԺ «Ժառանգություն» խմբակցության քարտուղար Թևան Պողոսյանը Գլխավոր դատախազության 2014 թվականի զեկույցի քննարկմանը գլխավոր դատախազ Գևորգ Կոստանյանից հետաքրքրվեց Մարդու իրավունքների եվրոպական դատարանում ընթացող «Փերինչեքն ընդդեմ Շվեյցարիայի» գործի մանրամասներից:
«Ի՞նչ փուլում է գործը, ե՞րբ է հնարավոր սպասել վերջնական արդյունքի և ի՞նչ հետևանքների կարող է տանել՝ ընդունելու կամ մերժելու հայցի խնդիրը»,- ասաց նա:
Գլխավոր դատախազը նշեց, թե առիթ ունեցել է ասելու, որ այս գործը Հայաստանի համար կարևոր է երկու առումով: «Նախ սա առաջին դեպքն է և Հայոց ցեղասպանության հարցը միջազգային իրավական հարթության մեջ որևէ կերպ քննարկման առարկա չի եղել: Վիճարկվում է այն հանգամանքը, որ Հայոց ցեղասպանությունը թեև որոշ միջազգային հանրային ճանաչում ունի աշխարհում, այնուամենայնիվ չի կարելի համադրել Հոլոքոստի հետ, քանի որ Հոլոքոստը Նյուրնբերգյան դատավարության ընթացքում ճանաչված իրավական փաստ է: Բացասական համեմատության իմաստով մեզ համար անհրաժեշտություն առաջացրեց միջամտենք որպես պետություն»,- ասաց նա:
