ՀԱԿ պատգամավոր Լյուդմիլա Սարգսյանն այսօր ԱԺ-ում Գլխավոր դատախազի տարեկան հաշվետվության ժամանակ նշեց, որ իր վրդովմունքն է ուզում հայտնել, որ երկու օր է՝ նրանից ոչ մի բան չեն լսում. «Ստացվում է՝ եթե գաք ու զեկույց չներկայացնեք, մեր կյանքում ոչինչ չի փոխվի: Դուք խուսափում եք ՎՊ նախագահի հանցագործության մասին հայտարարության մասին խոսելուց, դա ոնց որ իշխանության մեջ տաբու է դրված: Իշխան Զաքարյանն ասել է, որ փաստեր է ուղարկել դատախազություն, դուք ասում եք՝ ոչ: Ուզում եմ հասկանալ՝ ով է ձեզնից սուտ խոսում»:
Գլխավոր դատախազը հայտարարեց, որ իրենց տարեկան հաղորդումը դեռ մարտի 31-ին ուղարկվել է ԱԺ, որտեղ ներկայացված են ոչ միայն թվեր, այլեւ դրանց հիմնավորումները. «Այդ պատճառով իմ ելույթն այնպես եմ կառուցել, այն հույսով, որ պատգամավորները կծանոթանան հաղորդմանը, իսկ ես միայն տրամաբանությունն ու հիմքերը կներկայացնեմ: Մենք ՎՊ-ից որևէ հաղորդում չենք ստացել, սակայն դա չի նշանակում, որ դատախազությունն անգործություն է ցուցաբերում՝ երկու քրեական գործ եմ հարուցել՝ երկու տարվա մեջ՝ առանձին-առանձին: Եթե մենք մամուլի ասուլիսներ չենք տալիս, դա դեռ չի նշանակում, որ որեւէ բան չենք անում: Տիկին Սարգսյան, ես երբևէ չեմ խուսափում որևէ հարցից»:
