Կաննի կինոփառատոնի, բայց ոչ մրցութային, ծրագրի շրջանակներում տեղի է ունեցել ռեժիսոր Վուդի Ալենի ֆիլմի պրեմիերան:
«Իռացիոնալ մարդ» դրաման փիլիսոփայության պրոֆեսորի մասին է, որն էքզիստենցիալ ճգնաժամի մեջ է, և որն իր կյանքում նոր փուլ է սկսում՝ սիրավեպ սկսելով իր ուսանողուհու հետ: Բացի դրանից՝ ֆիլմում բարձրացվում է «իդեալական սպանության» հարցը:
Ֆիլմում գլխավոր դերերը խաղացել են Էմմա Սթոունը և Խոակին Ֆենիքսը: 26-ամյա Էմմայի համար դա հայտնի ռեժիսորի հետ աշխատանքի առաջին փորձը չէր (մինչ այդ ստեղծվել էր «Լուսնի լույսի մոգությունը»), բայց պարզվում է՝ դերասանուհին դեռ չի կարողանում հավատալ, որ դա իրականում իր հետ է կատարվում, և ամեն անգամ, երբ Ալենը դիմում է իրեն, նա անչափ հուզվում է։ Այս մասին հայտնում է starslife.ru-ն:
Լրագրողների հետ զրույցում Սթոունը պատմել է, որ իր նյարդերն իրեն հանգիստ չեն տվել նկարահանման բոլոր օրերի ընթացքում, քանի որ ինքը գիտեր, որ արժանացել է հանճարեղ ռեժիսորի հետ աշխատելու պատվին:
«Ես մշտապես ինձ վատ էի զգում: Ստամոքսս ինչ-որ աննորմալ ձևով էր արձագանքում իմ ապրումներին»,- հիշում է դերասանուհին: «Իրականում սրտխառնոց չունեի, պարզապես զգացողություն ունեի, որ դա ուր որ է՝ կլինի: Վուդիի հետ աշխատանքը երազանք է ինձ համար: Նա մարդ է, որով ես հիացել եմ: Նա տաղանդավոր է և հրաշալի»,- հավելել է Էմման:
