Աշխարհի տարբեր երկրների համեմատ, Հայաստանում սեռական հանցագործությունների վերաբերյալ գործող օրենքները խիստ մեղմ են: Սա է նմանատիպ հանցագործությունների աճի պատճառը:
Պատժամիջոցները խստացնելու համար մշակվել է «ՀՀ քրեական օրենսգրքում փոփոխություններ կատարելու մասին» օրինագիծ, որն արդեն առաջին ընթերցմամբ քննարկվել և հավանության է արժանացել ԱԺ-ում: Օրինագիծը ԱԺ է ներկայացրել պատգամավոր Վիկտոր Դալլաքյանը:
Օրինագծի հանրային քննարկումը տեղի ունեցավ այսօր` օրինագծի համահեղինակ, իրավաբան Դավիթ Թովմասյանի, Կանանց ռեսուրսային կենտրոն ՀԿ տնօրեն Լարա Ահարոնեանի մասնակցությամբ:
Դավիթ Թովմասյանի խոսքով, քրեական օրենսգրքի փոփոխությունները քննարկվել են կառավարական և հասարակական բազում կազմակերպությունների ներկայացուցիչների հետ և հետևաբար ներկայացնում են տարբեր մարմինների կարծիքը: Գործող օրենքից ներկայացված օրինագծի կարևորագույն տարբերությունն այն է, որ դրանով հանվել է տուգանք պատժամիջոցը, ինչպես նաև զգալիորեն խստացվել է ազատազրկման պատժաչափը:
Բազում երկրներում ընդունված պրակտիկային հետևելով` քննարկվելու է նաև քիմիական ճանապարհով ստերջացման պատժամիջոցը ներառելու հարցը: Այս պատժամիջոցը նոր օրենքում կներառվի միայն համապատասխան փորձագիտական քննության ենթարկելուց հետո:
