Փոքր ու միջին ձեռնարկությունների ներկայացուցիչները համակերպվել են «Շրջանառության հարկի մասին» նոր օրենքի հետ, որը ուժի մեջ կմտնի հուլիս ամսին: Առևտրականենրը որոշել են սպասել մինչ օրենքի կիրառումը, որից հետո կհասկանան՝ ինչ խնդիրներ են առաջ գալիս, ու դրանով պայմանավորված՝ կորոշեն իրենց հետագա անելիքը:
Հիշեցնենք, որ առևտրականների մի քանի շաբաթյա անընդմեջ բողոքի ակցիաներից հետո կառավարությունը միջանկյալ լուծում գտավ և ընդունված նոր օրենքի կիրառումը հետաձգեց մինչև հուլիս ամիս:
«Մեզ համար հետաքրքիրը կիրառման մասն է: Եթե դա խնդիր առաջացնի, բնականաբար՝ մենք նորից կընդվզենք: Իսկ եթե մարդիկ նորմալ ընդունեն օրենքը, ուրեմն նորմալ կլինի հարցը: Ամեն դեպքում ձեռներեցները պետք է որոշեն՝ իրենց ձեռնտո՞ւ է այդպես աշխատել, թե՞ ոչ»,- «Առաջին լրատվական»-ի հետ զրույցում ասաց «Փոքր ձեռներեցությամբ զբաղվողների հայկական միության» նախագահ Ստեփան Ասլանյանը՝ հավելելով. «Իսկ հիմա սպասում ենք, հասկանանք՝ սա լա՞վ է, թե՞ ոչ: Եթե որոշ ժամանակ կիրառելուց հետո հասկանանք, որ այն բանի պիտանի չէ, ուրեմն մեր բողոքը կհայտնենք»:
Միևնույն ժամանակ Ասլանյանը նկատեց, որ ինքը շարունակում է մնալ այն կարծիքին, որ եթե կառավարության մոտ ցանկություն կա, որ ՀՀ-ում տնտեսությունը զարգանա, ապա պետք է գնալ մեկ ուղղությամբ՝ հարկային բեռի նվազեցման:
«Իսկ այս նոր օրենքը հարկային բեռ է ձեռներեցի համար, ինչն անթույլատրելի է, և ինչը նշանակում է, որ այն վատ օրենք է: Եթե կարողանան մի պետության օրինակ բերել, որի տնտեսությունը զարգացել է հարկային բեռի ավելացմամբ, ապա ես երկու ձեռքով կողմ կլինեմ օրենքին»,- նկատեց Ասլանյանը:
Մեր զրուցակցի խոսքով՝ այդ նոր օրենքը, բացի հարկային բեռի ավելացումից, ենթադրում է նաև լրացուցիչ դժվարություններ: Մասնավորապես, ձեռնարկատերը պետք է հաշվապահ պահի, քանի որ ոչ բոլորը պատկերացում ունեն տոկոսի նվազեցումից կամ բարձրացումից: «Եվ հետո խնդիրներ կարող են առաջանալ ստուգումների հետ կապված: Տեսուչները ցանկացած պահի կարող են մտնել խանութ, տաղավար ու ստուգում իրականացնել: Ես չեմ հասկանում, թե ձեռներեցին որպես գող դիտարկելը ինչպե՞ս կարող է տնտեսությանը օգուտ բերել: Ախր, պետք է թողնել, որ մարդը հանգիստ աշխատի»:
Այնուամենայնիվ, Ասլանյանը նկատեց, որ օրենքի կիրառումից հետո եթե ձեռներեցը հասկանա ու իր մաշկի վրա զգա հարկային բեռի ավելացումը, ապա այն լուրջ ցնցումներ կառաջացնի:
«Բայց մենք հակված ենք հարցը ավելի քաղաքակիրթ դաշտում լուծելուն: Հուսով ենք՝ կառավարությունը նույնպես ցնցումների կողմնակից չի լինի»,- եզրափակեց մեր զրուցակիցը:
«Հրազդան» տոնավաճառի աշխատակիցներից մեկը մեզ հետ զրույցում նույն բանն ասաց. որոշել են սպասել՝ հասկանալու համար, թե կառավարությունը ինչպես է տրամադրված: «Գուցե հնարավոր է նորմալ կիրառեն, թողնեն աշխատենք: Բայց եթե տեսուչներին լցնեն շուկա ու սկսեն ստուգումները, մեզ ստիպեն, որ ամեն մի մանրուքի համար թուղթ-թղթաբանություն ներկայացնենք, ապա սա մեզ ձեռնտու չի լինի: Մենք նորից փողոց դուրս կգանք: Երկու կոպեկ փող ենք աշխատում, թող թողնեն հանգիստ աշխատենք, ոչ թե քթներիցս բերեն»,- ասաց մեր զրուցակիցը՝ հավելելով, որ իրենք երբեք չեն համակերպվի հարկային բեռի ավելացման հետ:
