Նախագահական ընտրություններում թեկնածուների լուսաբանման հավասար պայմանների ապահովումը պարզելու համար Հեռուստատեսության և ռադիոյի ազգային հանձնաժողովն անցած քարոզարշավի ընթացքում ամեն օր հերթափոխով մշտադիտարկել է 8 հեռուստաալիք՝ հավասար բաշխելով երկրում գործող կայանները: ՀՀ-ում գործում է 44 հ/կ և 20 ռ/կ: Ինչպես այսօր ասուլիսի ժամանակ հայտնեց ՀՌԱՀ նախագահ Գրիգոր Ամալյանը, իրենք դիտարկել են նաև առցանց և տպագիր լրատվամիջոցները:
ՀՌԱՀ-ը մշտադիտարկել է 11 հազար 689 ժամ եթեր, որից 9097 ժամը՝ հեռուստակայանների, 2592 ժամը՝ ռադիոկայանների, երբ լուսաբանվել են անմիջապես թեկնածուները և հեռարձակվել են քարոզչական նյութերն ու ծրագրերը:
«Էապես մեծացել է եթերաժամանակը, որ բոլորի կողմից տրամադրվել է թեկնածուներին: Իրավախախտումներ և վարչական տույժեր չեն եղել, որոշ տեխնիկական հարցեր լուծվել են աշխատանքային եղանակով: Այս ընտրություններն էականորեն ավելի լավ են լուսաբանվել, քան նախկինում»,- ասաց Գ. Ամալյանը:
Թեկնածուներն ընդհանուր առմամբ օգտվել են անվճար հեռուստաժամանակի մոտ 75%-ից: Ըստ Ամալյանի՝ նրանք գերադասել են հյուրընկալվել ծրագրերին: Ընդհանուր քարոզարշավի լուսաբանման ժամանակը գերազանցում է 586 ժամը, որը ՀՌԱՀ նախագահն անվանեց «աննախադեպ», քանի որ դա հավասար է ողջ քարոզարշավի ընթացքում մի հեռուստակայանի շուրջօրյա գործունեության:
Գ. Ամալյանը հայտնեց, որ յուրաքանչյուր թեկնածու եթերից օգտվել է տարբեր չափով. Հրանտ Բագրատյանը լուսաբանվել է 4644 րոպե, Պարույր Հարիկյանը՝ 8479 րոպե, Արամ Հարությունյանը՝ 2175 րոպե, Րաֆֆի Հովհաննիսյանը՝ 7079 րոպե, Անդրիաս Ղուկասյանը՝ 2256 րոպե, Արման Մելիքյանը՝ 2270 րոպե, Սերժ Սարգսյանը՝ 5476 րոպե, Վարդան Սեդրակյանը՝ 2427 րոպե: Չնայած լուսաբանման այս անհավասարությանը՝ Ամալյանը հայտարարեց, թե դա ՀՌԱՀ-ը չի դիտարկում որպես խտրականության դրսևորում կամ ոչ հավասար պայմանների ապահովում. «Անհամաչափությունն ակնհայտ է, բայց այն պայմանավորված է թեկնածուների կողմից իրենց քարոզչության իրականացման եղանակով: ՀՌԱՀ-ը դա խախտում չի գնահատում»:
Լուսանկարը՝ PanARMENIAN Photo-ի