Ճապոնիայի Կագոսիմա քաղաքում ակտիվիստների խումբն այսօր բողոքի երթ է սկսել այնտեղ գտնվող «Սենդայ» ԱԷԿ-ի վերագործարկման դեմ, հայտնում է TASS-ը: Ակցիայի կազմակերպիչները հայտնում են, որ մտադիր են 311 կմ անցնել մինչև կայանի օպերատոր Kushu Electric Power ընկերության գլխամասային գրասենյակ, որը գտնվում է Ֆուկուոկա պրեֆեկտուրայում:
Ակտիվիստները ծրագրում են ընկերության ղեկավարությանը փոխանցել տեղի բնակիչների 100.000 ստորագրությունները, որոնք դեմ են «Սենդայ» ԱԷԿ-ի վերագործարկմանը:
Ավելի վաղ հաղորդվում էր, որ Կագոսիմայի շրջանային դատարանը մերժել է անվտանգության նկատառումներով Սենդայում Kyushu Electric Power Co. ընկերության ԱԷԿ-ի 2 ռեակտորը չմիացնելու տեղի բնակիչների պահանջը: Դատարանի վճռի համաձայն՝ «Սենդայ» ԱԷԿ-ի թիվ 1 և թիվ 2 ռեակտորները կգործարկվեն այս տարվա հուլիսին. դրանք 2011թ. ուժեղ երկրաշարժի և ցունամիի հետևանքով Ֆուկուսիմայում տեղի ունեցած վթարից հետո կանգնեցվել էին՝ անվտանգությունը ստուգելու նպատակով:
Տեղի բնակիչները դատարան հայց էին ներկայացրել՝ պահանջելով հրաժարվել Սենդայում ռեակտորների գործարկումից, քանի որ բնական աղետների, այդ թվում՝ հրաբուխների ռիսկերը բավարար գնահատված չեն: Եթե «Սենդայ» ԱԷԿ-ի ռեակտորներն աշխատեն, այն կլինի առաջինը Ճապոնիայում, որը կգործի Ֆուկուսիմայի վթարից հետո:
