Երևանի քաղաքապետ Տարոն Մարգարյանը շնորհավորական ուղերձ է հղել Ընտանիքի միջազգային օրվա առթիվ:
«Սիրելի հայրենակիցներ,
ամբողջ աշխարհն այսօր նշում է Ընտանիքի միջազգային օրը:
Հայերիս համար այս օրն առանձնակի իմաստ ու խորհուրդ ունի, քանի որ ընտանիքը, օջախը մեզ համար սուրբ է և ունի նվիրական նշանակություն: Դարեր շարունակ հայ ընտանիքի, օջախի շնորհիվ են պահպանվել մեր ազգային շատ արժեքներ և ավանդույթներ ու, վստահաբար, հենց ընտանիքն է մեր ազգի գոյատևման, մեր հաղթանակների ու հարատևման գրավականը:
Հենց ընտանիքում է ձևավորվում մարդը որպես քաղաքացի:
Ընտանիքը սիրո, հարգանքի և հասարակական համերաշխության աղբյուր է, ու այդ սկզբունքների վրա է հիմնվում յուրաքանչյուր քաղաքակիրթ հասարակություն: Եվ գաղտնիք չէ, որ կայուն ընտանիքը ցանկացած պետության զարգացման կարևոր գործոններից մեկն է ու երաշխիքը, Հայաստանի համար՝ առավել ևս: Ու հատկապես հենց այս տեսանկյունից, համոզված եմ, որ ինչպես ինձ համար, այնպես էլ յուրաքանչյուր հայի համար մշտապես անընդունելի կլինի ցանկացած օտարածին երևույթ, որը խորթ է ավանդապահ հայ օջախին:
Շնորհավորելով Ընտանիքի միջազգային օրվա առթիվ՝ բոլոր հայ ընտանիքներին մաղթում եմ սիրով ու հարգանքով, մանկան քրքիջով լեցուն երկար տարիների խաղաղ և երջանիկ կյանք, ու թո՛ղ, որ հայ օջախներից անպակաս լինի ուրախությունը:
