ԱՄՆ-ը մեծացնում է Ռուսաստանում իրավապաշտպանների ֆինանսավորումը. «Իզվեստիա»

2014 թվականին ԱՄՆ բյուջեից ֆինանսավորվող և ողջ աշխարհում դրամաշնորհներ բաշխող Ժողովրդավարության աջակցման ազգային հիմնադրամը (NED) ռուսական ոչ կոմերցիոն կազմակերպությունների աջակցությանն է ուղղել 9.3 մլն դոլար։ Այս մասին հայտնում է «Իզվեստիան»։

2013 թվականի համեմատ՝ ֆինանսավորումն ավելացել է 1.3 մլն դոլարով՝ նշում է պարբերականը։

NED-ը միջոցներ է ստանում Միջազգային զարգացման ԱՄՆ կառավարական գործակալությունից (USAID), որի գործունեությունը Ռուսաստանում արգելված է 2012 թվականից։ 2015 թվականին հիմնադրամը ծրագրում է դրամաշնորհների վրա ողջ աշխարհում ծախսել 135 մլն դոլար, իսկ 2016-ի համար դեռևս նախատեսվում է 103.4 մլն դոլար։ Այս մասին հայտնի է դառնում USAID-ի և Պետդեպի համատեղ բյուջետային հայտարարագրից, որն ուղարկվել է կոնգրես։

Հաշվետվությունից պարզ է դառնում, որ NED-ն ընդլայնում է իր ազդեցությունը Ռուսաստանում։ Եթե 2013 թվականին ֆինանսավորվել է 85 կազմակերպություն, ապա 2014-ին դրամաշնորհ ստացողների ցուցակում ներառված եղել 96 կազմակերպություն։