Կառավարությունը նախատեսում է այսօրվա նիստում մերժել Ազգային ժողովի պատգամավոր Էդմոն Մարուքյանի՝ օրենսդրական նախաձեռնությունը: Պատգամավորն առաջարկում է փոփոխություններ կատարել «Շրջանառության հարկի մասին» ՀՀ օրենքում:
Ներկայացված նախագծով առաջարկվում է շրջանառության հարկ վճարվող չհամարել հաշվապահական հաշվառման ծառայություններ մատուցող այն կազմակերպություններին, որոնց կողմից մատուցված ծառայությունների իրացման շրջանառությունը նախորդ օրացուցային տարվա ընթացքում գերազանցել է 58.35 մլն դրամը: Հիմնավորման համաձայն՝ հաշվապահական հաշվառման ծառայություններ մատուցող կազմակերպությունների մոտ հարկային չարաշահումների հնարավորությունն աննշան է, իսկ եթե այդպիսիք կան, ապա հարկման դաշտը փոխելիս դրանք չեն վերանում:
Ըստ կառավարության անդամների՝ շրջանառության հարկի ներդրման նպատակը եղել է ոչ թե հարկային չարաշահումները կանխելը, այլ հարկման պարզ ընթացակարգերի ներդրումն այն տնտեսավարող սուբյեկտների համար, որոնք չունեն հարկերը ինքնուրույն հաշվարկելու բավարար կարողություն: Այս իմաստով, գտնում ենք, որ հաշվապահական հաշվառման ծառայություններ մատուցող կազմակերպությունները, որոնք այլ անձանց մատուցում են մասնագիտացված հաշվապահական ծառայություններ, պետք է ունենան հարկերը հաշվարկելու և հաշվապահական հաշվառում վարելու բավարար կարողություններ, և այդ տեսանկունից, նրանց շրջանառության հարկի դաշտում ներգրավելը նպատակահարմար չէ: