Ինչպես հայտնի է, հունիսի 7-ին քաղաքապետի ընտրություններ են նշանակված նաև Արտաշատ քաղաքում: Քաղաքապետի պաշտոնի համար ներկա պահին առաջադրվել է 3 թեկնածու: ՀՀԿ-ն առաջադրել է վարչապետ Հովիկ Աբրահամյանի անկուսակցական որդու՝ Արգամ Աբրահամյանի որդու թեկնածութունը: Նրանից բացի՝ ինքնաառաջադրվել են Աբրահամյանների ընտանիքի թշնամի համարվող Հովհաննես Ղազարյանը՝ հայտնի «Գազի Հովո» մականունով, և «Շահումյան ալքո» ՍՊԸ-ի տնօրեն Գարեգին Համբարձումյանը: Վերջինիս շատերն ընկալում են որպես դրածո, ձևական թեկնածու՝ առաջադրված Հովիկ Աբրահամյանի կողմից, որը ընտրապայքարի կեսից պետք է հանի իր թեկնածությունը հօգուտ կրտսեր Աբրահամյանի:
«Առաջին լրատվական»-ին, սակայն, հայտնի է դարձել, որ Գարեգին Համբարձումյանը բնավ էլ Հովիկ Աբրահամյանի դրածոն չէ: Նա ԱԺ ԲՀԿ խմբակցության պատգամավոր, նախկին ԲՀԿ-ական Կարո Կարապետյանի (Յուվեցի Կարո) հորաքրոջ որդին է, և միմյանց հետ շատ մտերիմ հարաբերություններ ունեն: Անգամ իրենց գործարաններն ու տներն են կողք կողքի կառուցել: Միասին էլ ժամանակին տոկոսով փող են տվել և դրա շնորհիվ բավականին հարստացել: Բացի այդ, Գարեգին Համբարձումյանի մյուս եղբայրը Յուվեցի Կարոյի թիկնապահ-աջ ձեռքն է:
Մեզ հասած տեղեկություններով՝ Համբարձումյանն ինքնակամ է առաջադրվել, որպեսզի Աբրահամյանները համոզեն հանել թեկնածութունը, ինչի դիմաց էլ մի պաշտոն կտան: Համբարձումյանը մինչև վերջին տարիները աշխատել է հարկային մարմնում և հիմա շատ է ցանկանում վերադառնալ հարկային: Ասում են՝ այս ընտրությունների արդյունքում նա թերևս կստանա այդ պաշտոնը՝ հանելով իր թեկնածությունը հօգուտ Արգամ Աբրահամյանի:
«Առաջին լրատվական»-ին հաջողվեց մի քանի հարց ուղղել Գարեգին Համբարձումյանին:
– Պարոն Համբարձումյան, Ձեզ համար դժվար չի՞ լինի մրցակցել վարչապետի որդու և մարզում հայտնի՝ Գազի Հովոյի հետ: Ինչպե՞ս եք գնահատում Ձեր շանսերը:
– Ընտրության ժամանակ ո՞վ կարա ասի՝ իրա շանսերը ոնց են: Ընտրության արդյունքները ցույց կտան շանսերը: Իսկ ես առաջադրվել եմ, քանի որ Արտաշատի քաղաքացի եմ, քաղաքի խնդիրներով եմ ապրում, դրա համար էլ ցանկություն ունեմ քաղաքապետ դառնալու: Էս քաղաքում ենք ծնվել մեծացել, հետևաբար բնական ա էդ ցանկութունը:
– Իսկ Ձեզ դժվար չի՞ լինի մրցակցել Արգամ Աբրահամյանի հետ:
– Ժամանակը ցույց կտա:
– Դուք նաև Կարո Կարապետյանի՝ Յուվեցի Կարոյի ազգականն եք: Արդյոք նա՞ է աջակցում Ձեզ այս ընտրություններում:
– Բացարձակ: Ես ոչ մեկի հովանավորության տակ չեմ: Ես ինքս եմ որոշում իմ ծրագրերը: Տենց բան չկա: Ազգակցական կապ միանշանակ կա, բայց ինքը էս ընտրապայքարին ոչ մի մասնակցություն չի կարող ունենալ, քանի որ ինքը նույնիսկ էս համայնքում գրանցված չէ ու այստեղից ձեն չունի:
– Պարոն Համբարձումյան, ասում են, որ հնարավոր է ընտրապայքարի կեսից ինքնաբացարկ հայտնեք՝ հօգուտ վարչապետի որդու:
-Ամեն ինչ հնարավոր է: Ոչինչ չի կարելի բացառել՝ էդպես ասեմ: Իսկ թե ում կսատարեմ կամ հօգուտ ում կհանեմ թեկնածությունս, ապա հլը տենց հարցերը երևի կոռեկտ չեն: Ես ոչ մեկին տեղեկություն չեմ տվել, որ հօգուտ Արգամ Աբրահամյանի եմ հանելու թեկնածությունս: Ընդամենը առաջադրվել ենք, հլը չենք էլ գրանցվել: Դեռ պետք է գրանցվենք:
– Այսինքն՝ կարող է բանը գրանցվելուն է՞լ չհասնի:
– Ամսի 20-ից հետո պարզ կլինի: Մինչև էդ ոչ մի հարցի չեմ կարող կոնկրետ պատասխանել:
– Իսկ կուսակցական չլինելով, որևէ քաղաքական ուժի աջակցությունը չստանալով՝ հե՞շտ է ընտրապայքարի մեջ մտնել:
– Ես երբեք ոչ մի կուսակցության մեջ չեմ եղել, ոչ մի քաղաքական ուժի վրա չեմ հենվում: Որպես ինքնաառաջադրված մարդ իմ ուժերի վրա եմ հենվում: Ուրիշ ավելացնելու բան չունեմ:
