Լեռնային Ղարաբաղի Հանրապետության Կենտրոնական ընտրական հանձնաժողովը հաստատել է 2015թ. մայիսի 3-ի ԱԺ ընտրություններին մասնակցած կուսակցություններին հասանելիք համամասնական մանդատների թիվը։
Ընտրությունների արդյունքում ԼՂՀ վարչապետ Արա Հարությունյանի գլխավորած «Ազատ հայրենիք» կուսակցությունը կստանա 11 մանդատ, Հայկ Խանումյանի ղեկավարած ընդդիմադիր «Ազգային վերածնունդ» կուսակցությունը՝ 1 մանդատ, ԼՂՀ ԱԺ նախագահ Աշոտ Ղուլյանի «Արցախի ժողովրդավարական կուսակցությունը»՝ 4 մանդատ, «Հայ Հեղափոխական Դաշնակցությունը»՝ 4 մանդատ, «Շարժում 88» կուսակցությունը՝ 2 մանդատ:
Ըստ ընտրական օրենսգրքի կուսակցությունները իրենց անվանական ցուցակները պետք է ներկայացնեն մանդատների թվի հրապարակման օրվանից հետո 7 օրվա ընթացքում։
Մայիսի 18-ին կկայանա կուսակցությունների անվանական ցուցակների հաստատումը:
ԼՂՀ Ազգային ժողովի աշխատակազմի ղեկավար Գարիկ Ժամհարյանն ավելի վաղ մեզ հետ զրույցում տեղեկացրել էր, որ Լեռնային Ղարաբաղի Հանրապետության նորընտիր Ազգային ժողովի հերթական նիստը տեղի կունենա մայիսի 21-ին: Ըստ ԱԺ կանոնակարգի՝ նորընտիր Ազգային ժողովի առաջին նիստը գումարվում է ընտրություններին հաջորդող երրորդ հինգշաբթի օրը: