Այսօրվա իր ուղերձում Վրաստանի նախագահ Միխեիլ Սաակաշվիլին հայտարարել է, որ 2008 թ. պատերազմի ժամանակ Ռուսաստանի նախագահ Վլադիմիր Պուտինն իր համար մահապատիժ էր սահմանել, որն իրեն չէր վախեցրել, և առավել ևս հիմա իրեն չեն վախեցնում Վրաստանի նոր իշխանությունների սպառնալիքները` կապված քրեական հետապնդում սկսելու հետ: Նա նշել է, որ ոչնչից չի վախենում և պատրաստ է պատասխան տալ իր բոլոր արածների համար:
«Ձեզ դուր է գալիս, թե ոչ, մենք ստեղծել ենք ժամանակակից և ուժեղ Վրաստան և այն մարդիկ, ովքեր եղել են և գտնվում են իմ կողքին արժանի չեն իրավապահ մարմինների կողմից ամենօրյա հետապնդումների»,- հայտարարել է նախագահը:
Սաակաշվիլին ընդգծել է, որ ինքը չի խոսում համաներման մասին, սակայն խոսում է քաղաքական դրդապատճառներով հետապնդումների դադարեցման մասին:
«Այսօր իշխանությունը ճնշումների, սպառնալիքների ճանապարհով վերացնում է ընդդիմությանը, սակայն մենք խնդրում ենք մարդկանց հանգիստ թողնել և չենք ուզում համաներում՝ նախագահի, կամ կառավարության նախկին պաշտոնյաների և փոքրամասնության պատգամավորների համար»,- ասել է Սաակաշվիլին:
Վրաստանի նախագահը ողջունել է սահմանադրական փոփոխությունների առնչությամբ խորհրդարանի փոքրամասնության և մեծամասնության համաձայնությունը, որը նաև իրեն է գոհացնում: Սակայն համաձայնություն չի լինի եթե շարունակվեն նախկին և ներկայիս պաշտոնյաների նկատմամբ հետապնդումները:
Սաակաշվիլին նշել է, որ նման հետապնդումները կհանգեցնեն նրան, որ Վրաստանից երես կթեքի Եվրոպան, և Վրաստանն այդպես էլ չի նստի այդ գնացքը, որը շատ բան է խոստանում և հարկավոր չէ բաց թողնել այդ հնարավորությունը:
