Թուրքիայում շարունակվում է Մեծամորի ատոմակայանի դեմ ուղղված արշավը: Հայկական ԱԷԿ-ի շահագործումը հերթական անգամ քննադատել է Թուրքիայի էներգետիկայի նախարար Թաներ Յըլդզը: Ինչպես տեղեկացնում է թուրքական «Հյուրիյեթ» պարբերականը, Յըլդըզը մասնակցել է Ստամբուլում մայիսի 6-ին մեկնարկած էներգետիկ ոլորտին նվիրված միջազգային համաժողովին, որի ժամանակ էլ ելույթ ունենալիս կրկին հիշեցրել է հայկական ատոմակայանի մասին: Թուրք նախարարը, ինչպես և նախկինում, նշել է, որ Մեծամորի ԱԷԿ-ը պետք է փակվի, քանի որ «վտանգավոր է»:
«Ես զարմանում եմ, թե ինչպես բնապահպանները նույն վերաբերմունքը չունեն Մեծամորի ԱԷԿ-ի նկատմամբ, ինչպես ունեին, օրինակ, Գեզի զբոսայգու ծառահատման ժամանակ»,-հայտարարել է Թուրքիայի էներգետիկայի նախարարը և կոչ արել միասին բնապահպանական բողոքի ակցիա անցկացնել Իգդիրում՝ Մեծամորի ԱԷԿ-ի շահագործման դեմ:
«Ատոմակայանը, որը մեր սահմանին այդքան մոտ է (16 կմ.- խմբ.), չի կարող շահագործվել միայն նրա համար, որ էլեկտրականություն է պետք: Մենք բազմիցս ասել ենք, որ մեր սահմանին մոտ գտնվող այս ատոմակայանը պետք է փակվի: Հայկական կողմը պնդում է, թե ատոմակայանը փակելով՝ առանց էլեկտրաէներգիա կմնա, սակայն, կարծում եմ, լուծումներ կգտնվեն»,- հայտարարել է Յըլդըզը՝ նշելով, որ հայկական ԱԷԿ-ի շահագործումը երկարաձգվել է, թեև այն պետք է փակվեր:
Նշենք, որ Թուրքիան դեռ չունի սեփական ատոմակայան: «Աքքույու» ատոմակայանը, որը դեռ կառուցման փուլում է, Թուրքիայի առաջին ատոմակայանն է և կառուցվում է Ռուսաստանի կողմից («Ռոսատոմ» ընկերություն)։ Սպասվում է, որ «Աքքույու» ԱԷԿ-ը կսկսի էլեկտրաէներգիայով ապահովել արդեն 2019 կամ 2020 թվականներին։ Ատոմակայանը կառուցվում է Մերսին նահանգի Աքքույու բնակավայրի հարևանությամբ` Միջերկրական ծովի ափին:
Ներկայումս թուրքերը, համագործակցելով Ճապոնական «Միցուբիշի» և Ֆրանսիայի «Արևա» ընկերությունների հետ, աշխատում են սևծովյան հատվածում երկրի երկրորդ ատոմակայանը կառուցելու ուղղությամբ, որից հետո ևս մի քանի ԱԷԿ կարող է կառուցվել, քանի որ Թուրքիայում էլեկտրաէներգիայի մեծ պահանջարկ կա։ Սևծովյան ափին երկրորդ ԱԷԿ-ի կառուցման աշխատանքները նախատեսվում է սկսել 2017 թվականին։
Թուրքական լրատվամիջոցներն ավելի վաղ տեղեկացրել էին, որ Թուրքիայի երրորդ և չորրորդ ատոմակայանները ևս կարող է ռուսաստանյան կողմը կառուցել, սակայն այս հարցում պաշտոնական պայմանավորվածություններ դեռ չեն գրանցվել:
Հետաքրքիր է, որ Թուրքիան, չունենալով սեփական ԱԷԿ և դրանք կառուցելով՝ հաճախ է թիրախավորում Հայաստանի Մեծամորի ԱԷԿ-ը: Քննադատելով հայկական ատոմակայանի անվտանգության մակարդակը` Թուրքիան փորձում է այս հարցում միջազգային ճնշում գործադրել Հայաստանի վրա:
