«Առաջին լրատվական»-ի զրուցակիցն է «Best travel» տուրիստական ընկերություն մենեջեր Անիկա Յազիչյանը:
–Հայաստանը զբոսաշրջիկներին ինչո՞վ է գրավում և զբոսաշրջության առումով ինչպիսի՞ իրավիճակ է :
–Հայաստանն աշխարհում ընկալվում է տարբեր կերպ: Առաջին առանձնահատկությունն այն է, որ ունի հարուստ պատմություն: Մենք ունենք պատմամշակութային հարուստ արժեքներ, որոնք մեծ հետաքրքրություն են առաջացնում զբոսաշրջիկների մոտ և որն էլ հենց տուրիզմի զարգացման թիվ մեկ նախադրյալն է համարվում: Մեզ մոտ տուրիստներ ունենում ենք առաջինը ՌԴ-ից, հետո շատ են գալիս Եվրոպայի զարգացած երկրներից՝ Ավստրիայից, Ֆրանսիայից, Իտալիայից, Իսպանիայից: Կախված խմբերի տեսակներից, մենք առաջարկում ենք նրանց բազմատեսակ ծառայություններ: Հիմնականում մեր մշակույթով են հետաքրքրված: Նրանց ավելի հետաքրքրում են մեր եկեղեցիները: Հայաստանը լինելով առաջին քրիստոնեական երկիրը, բոլորին գրավում է իր առաջին եկեղեցիներով, ինչպես նաև բրենդն է համարվում Արարատը, ծիրանը, նուռը:
–Ի՞նչ խնդիրներ են առաջանում զբոսաշրջիկի համար Հայաստանում:
–Խնդիրներն այնքան էլ շատ չեն: Միայն կարող եմ նշել բիոզուգարանների բացակայությունը: Մնացածից շատ գոհ և վառ տպավորություններով են վերադառնում մեր երկրից:
–Վերջին շրջանում շատ տուրիստներ եկան կապված 100-ամյակի միջոցառումների հետ: Հյուրանոցային խնդիրներ արդյո՞ք առաջացել էին:
–Մի քիչ խնդիրներ եղան, քանի որ հյուրանոցների պակաս լինելու պատճառով, երբեմն տուրիստները չէին կարողանում համարներ ամրագրել: Սակայն զբոսաշրջիկների թիվը շատ էր. կային զբոսաշրջիկներ, որոնց ամենասզկբից ավելի շատ հետաքրքրում էին հոսթելները, քան հյուրանոցները: Ավելի շատ հյուրանոցների առկայության դեպքում ավելի շատ զբոսաշրջիկներ կունենայինք Հայաստանում:
–Գնային քաղաքականության առումով զբոսաշրջիկների համար Հայաստանը թա՞նկ է, թե՞ մատչելի: Ի՞նչ խնդիրներ են առաջանում սկսած տաքսիից մինչև այլ ծառայություններ:
–Մեր ամենամեծ խնդիրը Հայաստանի ճանաչելիության բացակայության մակարդակն է, քանի որ շատ արտասահմանցիներ Հայաստան չեն գալիս այն պատճառով, որ ոչ թե մեզ մոտ գները բարձր են, այլ այն պատճառով, որ Հայաստանի մասին ընդհանրապես գաղափար չունեն: Եվ մեր նպատակն է աշխարհին ներկայացնել պատշաճ մակարդակով:
–Վերջին շրջանում Սերժ Թանկյանի համերգը, Քիմ Քարդաշյանի այցը որքանո՞վ նպաստեցին մեր զբոսաշրջության զարգացմանը: Կա՞ն արդեն իսկ Հայաստանով հետաքրքրվողներ, որից ելնելով մենք կարող ենք ասել՝ որոշակի ազդեցություն գործեց զբոսաշրջության վրա:
–Իհարկե, շատ մեծ պլյուս էր դա մեր ազգի համար, քանի որ Վրաստանից, Ռուսաստանից շատերը եկել էին Հայաստան զուտ Սերժ Թանկյանի համերգին մասնակցելու համար: Շատերը հետաքրքրվում էին թե երբ է համերգը լինելու, ասում էին` մենք կգանք, անպայման կմասնակցենք:
–Իսկ Քարդաշյանի՞ մասով: Օրինակ, նրան այստեղ հող են նվիրել և նա պատրաստվում է տուն կառուցել:
–Բոլորը հետաքրքրված էին Քարդաշյանի երթուղիներով: Բոլորին հետաքրքրում էր, թե որտեղ է ընթրել Քիմ Քարդաշյանը, ինչ ուղղություններով է գնացել և ասում են «մենք նույնպես կցանկանայինք այդ ուղղություններով տուր ունենալ»: Հենց հիմա էլ նրա երթուղիների թեման շարունակվում է:
Հարցազրույցն ամբողջությամբ ՝ տեսանյութում: